Saksóknari rannsakar handtöku óeinkennisklædds lögreglumanns í Smáralind

Handtaka sem lögreglumaður á frívakt framkvæmdi í Smáralind nýverið er til rannsóknar. Málinu var vísað til embættis héraðssaksóknara. Þetta staðfestir Ólafur Þór Hauksson héraðssaksóknari við fréttastofu en Mbl.is greindi fyrst frá.

„Því hefur verið vísað til okkar,“ segir Ólafur Þór sem að öðru leyti vill ekki tjá sig um málið.

Málið snýst um handtöku lögreglumanns á frívakt og notkun hans á varnarúða. Maðurinn var ekki einkennisklæddur þegar handtakan fór fram í verslun Lyfju í Smáralind. Samkvæmt lögreglu kom til átaka kom á milli lögreglumanns og manns sem abbaðist upp á viðskiptavini í Lyfju.

Í dagbókinni í síðustu viku kom fram að lögreglumaðurinn hafi reynt að ræða við manninn en það endaði með átökum sem lauk með því að lögreglumaðurinn beitti piparúða á manninn sem var síðan handtekinn. Hann var færður á lögreglustöð og lokaður inni í fangaklefa.