Velferðarráðuneytið flýr myglu og flytur úr Hafnarhúsinu

Velferðarráðuneytið mun flytja úr Hafnarhúsinu við Tryggvagötu þar sem ekki hefur tekist að uppræta myglusvepp og raka sem er í húsinu. Þetta kemur fram á vef ráðuneytisins. Tveir ráðherrar gegna embætti í velferðarráðuneytinu, heilbrigðisráðherra og húsnæðis- og tryggingamálaráðherra.

Á vef ráðuneytisins segir að ákvörðunin um flutninga hafi verið tekin eftir að ráðuneytið og eigandi hússins komust að sameiginlegri niðurstöðu að ástand húsnæðisins væri ófullnægjandi. Tvívegis hefur verið ráðist í framkvæmdir til að laga vandann án árangurs.

Leit er hafin að nýju húsnæði fyrir ráðuneytið en stefnt er að flutningi eins fljótt og hægt er.

Eigandi hússins, Faxaflóahafnir, sem er að stærstum hluta í eigu Reykjavíkurborgar, hefur samþykkt að leysa ráðuneytið undan leigusamningi vegna hússins. Talið er að ráðast þurfi í viðamiklar endurbætur á húsnæðinu til að uppræta myglusveppinn.

Aðrir eigendur Faxaflóahafna, og þar með hússins, eru sveitarfélagið Borgarbyggð, Akraneskaupstaður, Skorradalshreppur og Hvalfjarðarsveit.