Stefán Eiríksson ráðinn borgarritari

Stefán Eiríksson, sviðstjóri velferðarsviðs Reykjavíkurborgar og fyrrum lögreglustjóri höfuðborgarsvæðisins, hefur verið ráðinn borgarritari. Borgarritari er æðsti embættismaður borgarinnar að undanskildum borgarstjóra og einn af staðgenglum hans.

Stefán hefur frá 1. september 2014 starfað sem sviðsstjóri velferðarsviðs Reykjavíkur. En áður starfaði hann sem lögreglustjóri höfuðborgarsvæðisins frá árinu 2007. Þar áður starfaði hann sem skrifstofustjóri og staðgengill ráðuneytisstjóra dóms- og kirkjumálaráðuneytis á árunum 2002-2006.

Stefán lauk embættisprófi í lögfræði frá Háskóla Íslands í febrúar árið 1996. Þá hefur hann sinnt kennslu í lögfræði á háskólastigi og verið fyrirlesari á ýmsum vettvangi.

Í tilkynningu frá Reykjavíkurborg segir að Stefán hafi verið talinn uppfylla best allra umsækjenda þær kröfur sem gerðar eru til borgarritara.