Mikill meirihluti andvígur úthlutun ókeypis lóða til trúfélaga

Meirihluti Íslendinga, tæp 76 prósent, eru andvíg því að trúfélög fái úthlutað ókeypis lóðum til að byggja trúarbyggingar. Þetta er niðurstaða nýrrar könnunar MMR.

Í frétt MMR segir að af þessum 76 prósentum hafi 48,3 prósent aðspurðra verið mjög andvíg slíkum úthlutunum.

Einstaklingar í yngsta aldurshópnum, 18-29 ára voru almennt líklegri en eldri aldurshópar til að vera andvíg. Sömuleiðis voru íbúar höfuðborgarsvæðisins (77,6 prósent) líklegri til að vera andvíg en íbúar landsbyggðarinnar (72,3 prósent).

Stuðningsmenn Samfylkingar (16,6%) og Vinstri grænna (17,1%)  voru líklegri en stuðningsmenn annarra flokka til að vera fylgjandi.Stuðningsmenn ríkisstjórnarinnar (80,6%) voru líklegri til að vera andvígir heldur en þeir sem ekki studdu ríkisstjórnina (73,7%).

Nánar má lesa um könnunina í frétt MMR.