Segja vinnustaðanám mikilvægt samfélaginu

Yfir 160 fyrirtæki hafa skrifað undir sáttmála Samtaka iðnaðarins um vinnustaðanám. Katrín D. Þorsteinsdóttir, forstöðumaður menntunar og mannauðs hjá Samtökum iðnaðarins, segir sáttmálann mikilvægan til að styrkja samtalið milli skóla og fyrirtækja.

Í dag munu Samtök iðnaðarins standa fyrir málstofu helgaðri vinnustaðanámi undir yfirskriftinni: Þú færð pottþétt starf – atvinnurekendur axla ábyrgð á vinnustaðanámi, á Menntadegi atvinnulífsins. Þá verður sáttmálanum fagnað.

Fyrirtækin sem hafa staðfest sáttmálann lýsa yfir einlægum vilja til að auka aðgengi nemenda að vinnustaðanámi í fyrirtækjum til að efla og bæta iðn-, verk- og tæknimenntun ungs fólks.

„Það er mikill skortur á fagfólki, iðn-, verk- og tæknimenntuðu fólki. Á sama tíma heyrum við skólana tala um það að það sé erfitt að fá vinnustaðanám (komast á samning). Hins vegar segja fyrirtækin að þetta sé ekki svona erfitt. Því er ljóst að fólk er ekki að tala nóg saman og þarna er einhver pottur brotinn,“ segir Katrín.

Að sögn Katrínar er óljóst hversu margir eru að leita að vinnustaðanámsplássi, þar sem tölfræði sé ekki til staðar. Vinnustaðasáttmálinn sé mikilvægur og samtökin vilji auka jákvætt umtal um vinnustaðanámið.

„Þetta er dýrmætt nám fyrir samfélagið, það eru ekki margir sem kveikja á því en við heyrum það hjá nemunum,“ segir Katrín. Samhliða verði herferð undir yfirskriftinni „Þú færð pottþétt starf“.

„Þar erum við að leggja áherslu á það að vinnustaðanám er spennandi og þú færð dýrmæta reynslu. Í allflestum löggiltum iðngreinum ertu með öruggt starf að námi loknu sem er vel launað ef þú stendur þig vel,“ segir Katrín sem bendir einnig á að verið sé að skiptast á nemum í vinnustaðanámi milli landa núna. „Þetta eru alþjóðleg starfsréttindi og það skiptir máli að kynna það betur.“

Katrín segir að viðtökurnar við sáttmálanum hafi verið mjög góðar.

„Við sjáum fyrir okkur að við munum halda áfram að skrá fyrirtæki á þennan lista og hafa hann aðgengilegan á vefsíðu okkar og fyrir skóla svo þeir viti hvert þeir eigi að leita á komandi tímum,“ segir Katrín D. Þorsteinsdóttir.