Faðir Andra Freys telur um manndráp af gáleysi að ræða en ekki slys

Tuttugu mínútum áður en Andri Freyr Sveinsson féll úr tækinu Inferno í skemmtigarðinum Terra Mitica á Benidorm sumarið 2014 var framkvæmd neyðarstöðvun á tækinu. Sveinn Sigfússon, faðir Andra, segist hafa fengið þessar upplýsingar í desember síðastliðnum. Um leið hafi hans skoðun breyst á því að um slys væri að ræða. Um sé að ræða manndráp af gáleysi.

Þá gagnrýnir hann að upplýsingar um hámarksþyngd og -hæð þeirra sem fóru í tækið hafi ekki verið sýnilegar og séu ekki enn. Hámarksþyngd hafi verið 120 kíló en Andri verið þyngri en það. Hann hafi séð fjölmarga stærri fara í tækið og starfsmenn hafi ekki einu sinni verið meðvitaðir um að hámark væri á þyngd þeirra sem færu í tækið.

Fólkið í röðinni öskraði

Í Morgunútvarpinu á Rás 2 í morgun var spilað brot úr Kastljósviðtali við Svein og Huldu Guðjónsdóttur, stjúpu Andra. Þau voru með Andra í umræddum skemmtigarði 7. júlí 2014 og í sama tæki. Andri fór í tækið ásamt vini sínum og yngri systur.

„Við fylgjumst með þar sem þau setjast í tækið. Maðurinn kemur og spennir þau. Svo fer tækið af stað. Þegar kemur að síðustu veltunni þá er okkur Daníel vísað í sæti. Það næsta sem við vitum er að röðin grípur fyrir augu sér, öskrar og hleypur í burtu. Við sjáum skugga og heyrum hljóð,“ segir Hulda.

Hulda lýsir því hvernig þau Daníel hafi litið hvort á annað til að fá fullvissu um að þau hafi séð þetta gerast. Rússíbaninn hafi ekki farið af stað aftur og grindin opnast. Þau stukku út og Hulda sér Andra Frey þar sem hann liggur á grúfu.

„Ég kalla til hans, sé að hann hreyfir sig örlítið og umlar. Ég bið Daníel að hlaupa eftir Denna (Sveini).“

Enginn sjúkrabíll á vettvangi

Sveinn var fljótur að gryfjunni þar sem Andri Freyr lá en um var að ræða steypt plan og möl.

„Þar liggur hann á maganum, umlar eitthvað og hreyfir sig mikið. Það er norskur læknir sem ég tala við. Við hjálpumst að við að halda Andra niðri.“

Þrátt fyrir að um afar fjölsóttan skemmtigarð sé að ræða var enginn sjúkrabíll til taks þegar slysið varð. Það tók hann 25 mínútur að koma á vettvang. Andri lét lífið í sjúkrabílnum.

Sveinn segist hafa fengið þær upplýsingar rétt fyrir jólin að tækið hefði farið niður og stoppað tuttugu mínútum fyrir ferð Andra. Um neyðarstopp hafi verið að ræða.

„Að mínu viti þá breyttist málið úr slysi í manndráp af gáleysi.“

Telur starfsmenn hafa logið

Sveinn telur ljóst að bilun í læsingu á járngrindinni hafi valdið því að Andri féll úr tækinu. Hún hafi opnast á ferð.

„Það kemur fram í gögnum málsins að hann hefði mátt vera 120 kíló. Hann var þyngri en það. En enginn starfsmaður vissi að það væri hámarksþyngd í tækið, eða hámarkshæð. Ég hef séð myndir af mun stærri manneskjum en honum fara í tækið. Ég held að skýringin ein og sér, að hann hafi verið stór, sé ekki ásættanleg. Enda opnaðist grindin og ég á myndir af slysstað þar sem sést að grindin er opin þrátt fyrir að starfsmenn hafi sagt að hún var lokuð allan tímann.“

Af því sé ljóst að starfsmenn sögðu ekki satt við yfirheyrslu hjá lögreglu.

„Þeir voru yfirheyrðir sólarhring eftir slysið. Það stemmir ekkert af því sem þeir segja.“

Fjölskylda Andra stendur enn í málarekstri við skemmtigarðinn einu og hálfu ári síðar.