Hóta ráðherra málsókn vegna laxeldis í sjókvíum

Landssamband veiðifélaga (LV) ætlar að láta sverfa til stáls svari Sigurður Ingi Jóhannsson, sjávarútvegs- og landbúnaðarráðherra, ekki umleitunum sambandsins vegna fyrirhugaðs sjókvíaeldis á laxi í Ísafjarðardjúpi og Eyjafirði.

Í mars í fyrra sendi Óðinn Sigþórsson, þáverandi formaður LV, ráðherra bréf þar sem áformum um eldi á norskum laxi í sjó var harðlega mótmælt. Var þar vísað til nefndarvinnu árið 1988 þar sem sérstaklega var fjallað um reglur um dreifingu norskra laxastofna hér við land. Niðurstaðan, undirrituð af stjórnvöldum og hagsmunaaðilum, var að eldi innfluttra laxastofna skyldi eingöngu heimilt í strandeldisstöðvum og óheimilt með öllu að ala norskan lax við Íslandsstrendur.

Jón Helgi Björnsson, formaður LV, hefur nú áréttað erindið og krafist svars, enda sjö mánuðir liðnir þar sem erindið hefur verið margítrekað.

„Þessi málsmeðferð ráðuneytisins er með öllu óásættanleg, þar sem nú liggur fyrir að fiskeldisfyrirtæki hafa hafið undirbúning sjókvíaeldis á norska laxinum á báðum þessum svæðum,“ skrifar Jón Helgi og gerir grein fyrir því að lögmaður LV hefur skoðað réttarstöðu veiðiréttareigenda með hliðsjón af samkomulaginu frá 1988, og verði gefin út eldisleyfi fyrir eldinu fyrir vestan og norðan muni LV leita til dómstóla svo hnekkja megi þeirri ákvörðun.

Þess utan gerir Jón Helgi grein fyrir því að fáist ekki efnislegt svar fyrir miðjan febrúar muni LV leita til umboðsmanns Alþingis, enda sé málsmeðferð ráðuneytisins ámælisverð og ekki í samræmi við stjórnsýslulög eða góða stjórnsýsluhætti.