Innlent

Nýjar reglur um Airbnb en enginn með eftirlitið

Jóhann Óli Eiðsson skrifar
Lítil pappírsvinna fyrir sýslumenn mun fylgja skráningunni þar sem hún verður á rafrænu formi.
Lítil pappírsvinna fyrir sýslumenn mun fylgja skráningunni þar sem hún verður á rafrænu formi. vísir/vilhelm
Ekki liggur enn fyrir hvernig eftirliti með skráningu heimagistingar verður háttað. Lagabreyting, oft kennd við Airbnb, tekur gildi um áramótin.

Breytingin felur í sér útvíkkun á flokki heimagistingar. Einstaklingar mega leigja fasteign út í heimagistingu í allt að níutíu daga ár hvert án rekstrarleyfis. Tekjur af útleigu mega ekki nema meira en einni milljón króna. Til þess þarf að skrá fasteignina hjá sýslumanni í því umdæmi þar sem fasteignin er.

Í kjölfarið fær einstaklingur skráningarnúmer á eignina sem nota þarf í allri markaðssetningu á henni. Verði einstaklingur uppvís að því að brjóta gegn ákvæðum laganna getur hann átt von á sekt allt að einni milljón króna.

Fréttablaðið hafði samband við nokkra einstaklinga sem bjóða upp á heimagistingu í gegnum Airbnb.com og kannaði hvort þeir hefðu kynnt sér nýju lögin. Af þeim sem svöruðu höfðu flestir í hyggju að skrá íbúð sína hið fyrsta og nokkrir höfðu nú þegar haft samband við sýslumann til að fá á hreint hvernig best væri að snúa sér í þeim efnum.

Drög að reglugerð um gististaði og veitingastaði var birt í nóvember síðastliðnum til umsagnar. Endanleg reglugerð verður ekki birt fyrr en á nýju ári. Samkvæmt drögunum verður umsýsla og eftirlit í höndum Sýslumannsins á höfuðborgarsvæðinu en ekki liggur ljóst fyrir hvort, eða þá hvert, það verður fært til annars embættis.

Sem stendur er unnið að því að útbúa skráningarform á miðlægu vefsvæði þar sem heimagisting skal skráð. Stefnt er að því að kerfið verði tekið í gagnið á fyrstu vikum nýs árs. Þar verða einnig aðgengileg öll númer skráðra eigna í heimagistingu.

Starfsmenn sýslumannsembætta sem Fréttablaðið ræddi við segja ótímabært að ræða hvernig framkvæmd eftirlits með nýju lögunum verður háttað enda óljóst hvaða embætti muni sinna því. 

Fréttin birtist fyrst í Fréttablaðinu




Fleiri fréttir

Sjá meira


×