Brutu lög við sölu á DV

DV braut ákvæði laga um neytendasamninga og ákvæði laga um húsgöngu og fjarsölusamninga með því að veita neytendum ekki nægar upplýsingar í og eftir sölusímtöl þegar DV var boðið í áskrift. Þetta er niðurstaða Neytendastofu sem úrskurðaði um málið eftir að stofnuninni bárust ábendingar og kvartanir vegna símasölu DV á blaðaáskriftum.

Neytendur kvörtuðu yfir því að þeim hafi verið boðin frí áskrift að DV en ekki hafi komið fram nauðsynlegar upplýsingar um að þeir færu sjálfkrafa í þriggja mánaða áskrift að frítímabili loknu. Þá hafi neytendum reynst erfitt að segja samningi upp.

Neytendastofa sendi DV fyrirspurnir vegna málsins. Bent var á að fyrirtæki í símasölu verða í samtalinu að veita fullnægjandi upplýsingar um tilboðið, meðal annars varðandi uppsagnarfrest og binditíma, auk þess að senda þær skriflega að sölu lokinni.

Fréttin birtist fyrst í Fréttablaðinu.