Húsgögn keypt fyrir tugi milljóna króna

Kostnaður vegna framkvæmda í Ráðhúsinu frá 2012 er tæpar 170 milljónir. Frá 2012 hefur verið unnið að því að breyta innréttingum í Ráðhúsinu til að mæta nýjum þörfum en engar framkvæmdir voru í húsinu frá 2004.

Alls hefur Reykjavíkurborg eytt um 200 milljónum króna í framkvæmdir við Ráðhúsið frá 2001. Tæpar 40 milljónir hafa farið í húsasmíði, um 28,3 milljónir í húsgögn og 15,6 milljónir í verkfræðinga og tæknifræðinga. Aðrir einstakir kostnaðarliðir ná ekki tíu milljónum. Á þessu ári hefur borgin eytt 18 milljónum í húsasmíði og 12 milljónum í húsgögn. Þetta kom fram á borgarráðsfundi á fimmtudag. Þar kemur fram að húsið hafi upphaflega verið innréttað sem einkaskrifstofur og afgreiðslusvæði með um 60 starfsstöðvar.

Aðeins var eitt fundarherbergi í skrifstofuhlutanum með mjög takmörkuðum aðgangi. Eftir breytingarnar eru nú 110 starfsstöðvar í skrifstofuhlutanum, auk 12 nýrra fundarherbergja fyrir 10-12 manns. Verði af áætluðum framkvæmdum hefur nýting skrifstofuhúsnæðisins tvöfaldast frá því sem upphaflega var. Frá því að framkvæmdir hófust árið 2012 er áætlað að starfsmönnum hafi fjölgað um 35-40.

Dæmi um aukna nýtingu húsnæðis er að 24 starfsmenn menningar- og ferðamálasviðs fluttu í skrifstofuhúsnæðið á þessu ári, sem sparaði borginni um 24 milljónir í leigu á ári, og 16 starfsmenn skrifstofu eigna og atvinnuþróunar eru nú í rými þar sem fyrir breytingar unnu sjö manns.

Fréttin birtist fyrst í Fréttablaðinu