Breyta reglum fyrir litla framleiðendur

Unnið er að breytingu á reglugerð um sölu afurða beint frá býli þannig að þeir bændur sem framleiða lítið og eru með takmarkaða dreifingu fái svigrúm frá regluverkinu. Matvælastofnun vakti athygli á því fyrir helgi að sala afurða beint frá býli sé starfsleyfisskyld enda kveða matvælalög skýrt á um að hver sá sem dreifir matvælum skuli hafa leyfi yfirvalda til þess, annaðhvort frá Matvælastofnun eða heilbrigðiseftirliti viðkomandi sveitarfélags.

Mikil aukning hefur orðið á sölu matvæla beint frá býli að undanförnu og segir Þorgrímur Einar Guðbjartsson, formaður samtakanna Beint frá býli, að regluverkið sé ekki íþyngjandi og flestir sem sæki um starfsleyfi fái það. „Það þarf að vera eitthvað mikið að til að viðkomandi fái ekki leyfið. Nýju reglurnar áttu að taka gildi þann 1. júlí en ég veit að það hefur ekki enn orðið af því.“

Dóra S. Gunnarsdóttir, forstöðumaður um neytendavernd hjá MAST, segir að umræðan í þjóðfélaginu hafi verið hávær um að bændur ættu að geta selt kjöt beint til neytenda. 

„Við vildum vekja athygli á starfsleyfinu með þessari tilkynningu. Reglugerðin er í umsagnarferli og þar erum við að skilgreina litlar matvælavinnslur og veitum undanþágur frá meginkröfum í hollustuháttalöggjöfinni. Það er verið að skilgreina lítil fyrirtæki sem er þá aukabúgrein. Það er verið að gera þeim auðveldara fyrir. MAST benti á að 300 kíló á viku væri hæfilegt en Beint frá býli skrifaði okkur athugasemd og vildi fjórfalda það magn. Þegar er verið að framleiða 1.200 til 1.500 kíló á viku er það orðið meira en lítil vinnsla.“

Fréttin birtist fyrst í Fréttablaðinu.