Septemberspá Siggu Kling – Fiskar: Hreinskilnislegt hrós leysir ýmislegt

Elsku glansandi fallegi Fiskurinn minn. Ég á reyndar að segja elsku fiskarnir mínir því fiskar eru eina merkið sem er í fleirtölu, því það eru alltaf tveir fiskar. Það segir líka að þú nærist á fólki og félagsskap, eftir því sem tengslanetið þitt er betra því meiri orku hefur þú.

Þú skalt ekki halda í eina mínútu að það hæfi þér að sitja í Lazy Boy og glápa á sjónvarpið allan daginn. Þú hressist allur við þegar fólk er í kringum þig. Og haustið mun gefa þér aragrúa af tækifærum til þess að vera í kringum fólk sem magnar þig upp.

Þú átt það til að hugsa sem svo að þú sért mikill einfari, ekki einu sinni láta þér detta það í hug. Auðvitað líður þér vel heima hjá þér því þú býrð til svo kósí heimili. En það þarf alltaf einhver að búa þar líka til þess að þú finnir hamingjuna.

Þú virðist ekki hafa mikinn tíma í að hafa áhyggjur á næstunni. Hversu dásamlegt er það? Um leið og 10. september er kominn, þá ertu kominn á fullan skrið og getur alls ekki bremsað. Þú varst búinn að ákveða að vera ekki að flækja þig í marga hluti, þú ætlaðir að einfalda líf þitt svo mikið. En áður en þú veist af verður þessi mánuður eins og Mary Poppins kvikmynd og þegar þú skoðar betur, þá  verður þú eins og hún og finnur alltaf einhverja lausn til þess að breyta erfiðleikum í sigur.

Þú ert fyrirmynd fyrir svo marga. En samt finnur þú ekki nógu vel hversu montinn þú ættir að vera af sjálfum þér. Mont og stolt eru systur og ég vil að þú vaknir á hverjum degi, lítir í spegilinn og segir við sjálfan þig: „Mikið svakalega er ég ánægður og montinn að geta hangið með þér í dag.“

Í ástinni verður friður, þú getur haft trú á ástinni í kringum þig og þar af leiðandi slakað á og verið þú sjálfur. Þetta er búið að vera mjög merkilegt sumar og kannski hægt að segja að nú taki alvaran við.

Ekki skamma neinn og ekki gagnrýna neinn í kringum þig. Hentu frekar hreinskilnislegu hrósi í það fólk sem fer í taugarnar á þér. Það leysir mörg vandamál þótt það hljómi léttvægt. Þér á eftir að koma á óvart hve peningamálin verða í góðu jafnvægi. Svo hafðu engar áhyggjur af þeim, tíminn mun leysa þau.

Knús og Klapp, þín Sigga Kling

Frægir Fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign og Baby Kling.



Sigga Kling verður í beinni sjónvarpsútsendingu á Vísi klukkan 13:00 í dag og geta lesendur sent inn spurningar í athugasemdarkerfinu hér að neðan. Hægt verður að spyrja Siggu um allt á milli himins og jarðar. Einnig má senda inn spurningar á stefanp@365.is.