Stjörnuspá Siggu Kling – Sporðdreki: Það er ekki allt ríkisstjórninni að kenna!

Elsku sjóðheiti Sporðdrekinn minn. Það verða aldeilis dásemdar fréttir sem þú færð þegar þú svífur inn í næstu mánuði!

Það eina sem þú mátt ekki gera er að vorkenna þér fyrir þetta eða hitt. Í hvert skipti sem þú sendir frá þér þannig orku og ferð að tala um hvað allt er ómögulegt, þá missir þú máttinn þinn.

Snarhættu að tala um það sem þú vilt ekki í lífi þínu, hvort sem það er hjá þér eða einhverjum öðrum og farðu að tala um hvernig þú vilt hafa líf þitt og hvaða orka gerir þig hamingjusaman. Um leið og þú gerir þetta þá verður tengingin við alheiminn miklu betri og þú færð þær gjafir sem þú átt skilið frá honum. Þú munt skilja að hamingjan býr í huga þínum. Og það er alveg sama hvort þú átt mikið eða lítið, það kemur hamingjunni ekki við.

Þetta er ekkert allt saman ríkisstjórninni að kenna! Það er ekki vandamálið sem drepur þig heldur afstaða þín til þess, mundu það, Sporðdrekinn minn! Þú ert leikstjórinn eigin lífs.

Þú ert að fara inn í svo spennandi tíma það mætti halda að Margit Sandemosem skrifaði Ísfólkið væri að skrifa handritið að lífi þínu því hver blaðsíða kemur meira á óvart en þú varst búinn að ímynda þér.

Þetta haust færir þér svo sannarlega betri og kraftmeiri orku frá himintunglunum heldur en síðasta haust. Þú þarft að skoða hvernig hlutirnir voru til að sjá svart á hvítu hversu miklu betri þeir eru í dag.

Ástin liggur eitthvað svolítið í leynum fyrir þá sem eru á lausu og þú sérð ekki alveg hvað er rétt og hvað er rangt. Leyfðu ástinni bara að gerast, ekki berjast á móti og synda á móti straumnum. Það er kominn tími til þess að einhver heilli þig upp úr skónum og beina leið úr buxunum. Eða að minnsta kosti ef allt gengur vel!

Þú þarft að skerpa sjálfstraustið og sjá hvað þú ert með mikið sexappíl. Það skiptir ekki máli hvort þú ert 40 kg eða 140 kg, því mundu að kynþokkafyllsti maður landsins sem var kosinn af Séð og heyrt um daginn var að sjálfsögðu Ólafur Darri. Kynþokki kemur innan frá og ef einhver er kynþokkafullur, þá ert það þú!

Þegar þú lætur þig skína, þá sjá þeir sem eru þín verðugir ljósið sem stafar frá þér. Ástin er í loftinu!

Knús og klapp,  þín Sigga Kling

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari.

Sigga Kling verður í beinni sjónvarpsútsendingu á Vísi klukkan 13:00 í dag og geta lesendur sent inn spurningar í athugasemdarkerfinu hér að neðan. Hægt verður að spyrja Siggu um allt á milli himins og jarðar. Einnig má senda inn spurningar á stefanp@365.is.