Hard Knocks byrjar á Stöð 2 Sport í kvöld

Stöð 2 Sport hefur sýningar á heimildaþáttaröðinni Hard Knocks í kvöld.

Hard Knocks er framleitt af HBO-sjónvarpsstöðinni og fylgir eftir einu NFL-liði í gegnum undirbúningstímabilið sem hófst í byrjun júlí.

Að þessu sinni verður fylgst með liði Los Angeles Rams sem flutti frá St. Louis fyrir núverandi tímabil. Liðið átti enn fremur fyrsta valrétt í nýliðavalinu í vor og valdi þá leikstjórnandann Jared Goff.

Alls eru þættirnir fimm talsins og verða fyrstu fjórir þættirnir sýndir daglega og lokaþátturinn svo á mánudagskvöld í næstu viku en Rams spilar svo sinn fyrsta leik á tímabilinu aðfaranótt þriðjudags.

Stiklu úr þættinum má sjá hér fyrir neðan en það er má sjá meira myndefni á heimasíðu HBO.

Þess ber að geta að Stöð 2 Sport mun svo sýna fyrsta leik Rams í Los Angeles síðan 1994 er það spilar í hinum sögufræga LA Coliseum-leikvangi gegn Seattle Seahawks sunnudaginn 18. september.

Nýtt tímabil hefst í NFL-deildinni á fimmtudagskvöld en þá mætast í opnunarleiknum sömu lið og mættust í Super Bowl í upphafi ársins - Denver Broncos og Carolina Panthers.

Ein stór breyting er þó á liði Denver enda lagði leikstjórnandinn Peyton Manning skóna á hilluna eftir sigurinn í Super Bowl í febrúar.

Stöð 2 Sport mun eins og á síðasta tímabili sýna einn leik hvert sunnudagskvöld. Það verða ávallt leikir sem byrja á milli 20 og 20.30. Allir leikir úrslitakeppninnar verða svo sýndir en hún hefst í janúar.

Dagskrá Hard Knocks:

Þriðjudagur 6. sept kl. 21.10: Þáttur 1

Miðvikudagur 7. sept kl. 21.20: Þáttur 2

Fimmtudagur 8. sept kl. 20.50: Þáttur 3

Föstudagur 9. sept kl. 21.30: Þáttur 4

Mánudagur 12. sept kl. 20.45: Þáttur 5 (Stöð 2 Sport 2)

- Þátturinn er endursýndur á Stöð 2 Sport klukkan 23.30.

Leikir á Stöð 2 Sport:

Sunnudagur 11. sept kl. 20.20: Dallas Cowboys - NY Giants

Sunnudagur 18. sept kl. 20.00: LA Rams - Seattle Seahawks

Sunnudagur 25. sept kl. 20.20: Philadelphia Eagles - Pittsburgh Steelers