Vilja leggja himinháa skatta á bónusgreiðslurnar: „Þetta verður að stöðva með öllum ráðum“

Bónusgreiðslur til starfsmanna Kaupþings og gamla Landsbankans voru ræddar á Alþingi í dag en ítarlega hefur verið fjallað um greiðslurnar í fjölmiðlum eftir að greint var frá þeim í DV í seinustu viku og í dag.

Tillaga um bónusgreiðslur til starfsmanna Kaupþings liggur fyrir aðalfundi félagsins í dag en þær geta numið allt að 1,5 milljörðum króna. Þá gætu bónusar starfsmanna gamla Landsbankans einnig numið milljörðum. Þar sem um eignarhaldsfélög er að ræða falla kaupaukarnir ekki undir lög um fjármálafyrirtæki og því er í raun ekkert ólöglegt við þá. Mörgum blöskrar hins vegar og þingmönnum þar á meðal.

Helgi Hjörvar þingmaður Samfylkingarinnar sagði erlenda kröfuhafa vera hamingjusömustu kröfuhafa í heimi þar sem þeir hafi nú boðið stjórnendum sínum himinháa bónusa ef endurheimtur nái þeim markmiðum sem þeir hafa sett. Helgi sagði ástæðu til að gjalda varhug við slíkum bónusgreiðslum, ekki síst þegar ástandið í heilbrigðiskerfinu og hjá lífeyrisþegum væri eins og það er nú.

Vill sjá 90 til 98 prósent skatt á bónusana

Þorsteinn Sæmundsson þingmaður Framsóknarflokksins sagði hrunið hafa snert flesta hópa hér á landi fyrir utan einn þó og nefndi erlendu kröfuhafana sem hann sagði hafa stórgrætt. Þá sagði hann það einn mesta gjafagerning Íslandssögunnar þegar kröfuhöfunum voru afhentir bankarnir á sínum tíma, að hans sögn með einu pennastriki, í tíð síðustu ríkisstjórnar.

„Það sætir nokkrum tíðindum að slitabúin eru búin að ráða sér nokkra rukkara til að hámarka gróða sinn af þessum gjafagerningi en við vitum ekki hvaða eignir þetta eru. Eru þetta fyrirtæki sem voru rifin af fólki? Eru þetta heimili þeirra? ... En rukkararnir eiga að innheimta þessa peninga og fyrir það eiga þeir að fá bónusa sem eru svona eins og ársvelta lítilla fyrirtækja,“ sagði Þorsteinn og bætti síðan við að hann vildi leggja 90 til 98 prósent skatt á bónusgreiðslurnar svo tryggt væri að þau framlög slitabúanna myndu ekki lenda hjá fámennum hópi heldur allri þjóðinni.

Valgerður Bjarnadóttir þingmaður Samfylkingarinnar vill einnig leggja skatta á bónusgreiðslurnar. Hún sagði það endurspeglast í umræðum um bónusgreiðslurnar á þingi að þingmenn væru í ágætum tengslum við þjóðina enda gæti hún gert sér í hugarlund að um fátt annað væri rætt á kaffistofum landsins. Valgerður sagði það ekki vera svo að ekkert væri hægt að gera; það væri einfaldlega hægt að leggja mjög háa skatta á greiðslurnar.

„Fjármálaráðherra hæstvirtur hefur yfir mörgum sérfræðingum að ráða og það gleddi mig mjög ef hann kæmi hér á næstu dögum tillögu um að það að það yrði lagður á hár skattur, hvalrekaskattur kalla það sumir, á þessar kaupaukagreiðslur ef það er ekki annað í spilunum og ég held að það sé ekki annað í spilunum.“

Þingmaður Framsóknar vitnaði í fleyg orð Styrmis Gunnarssonar um „ógeðslegt þjóðfélag“

Karl Garðarsson þingmaður Framsóknarflokksins sagði fréttirnar af bónusgreiðslunum bæði ömurlegar og fyrirsjáanlegar.

„Fyrrverandi framkvæmdastjóri fyrirtækja í sjávarútvegi fær 23 milljónir króna í þóknun á ári fyrir að sitja í stjórn LBI fyrir utan væntanlegar bónusgreiðslur. Þau laun miða við að hann starfi fyrir stjórnina að hámarki 40 daga á ári. Það þýðir að hann fær 575 þúsund krónur fyrir hvern dag sem hann starfar fyrir stjórnina,“ sagði Karl.

Hann sagði síðan nýjar persónur og leikendur vera komna á sviðið en tilgangurinn væri hins vegar sá sami; að græða sem mest á sem einfaldastan hátt.

„Þetta verður að stöðva með öllum ráðum. Fyrrverandi ritstjóri Morgunblaðsins sagði fyrir nokkrum árum að þetta væri ógeðslegt þjóðfélag. Þetta er allt ógeðslegt, það eru engin prinsipp og það eru engar hugsjónir, það er ekki neitt. Það er bara tækifærismennska, valdabarátta sagði hann. Okkur hefur miðað í rétta átt á mörgum sviðum en það er greinilega margt ógert,“ sagði Karl en þarna vitnaði hann í fleyg ummæli Styrmis Gunnarssonar sem höfð voru eftir honum í skýrslu rannsóknarnefndar Alþingis árið 2010.