Hinn Íslendingurinn um rannsókn lögreglu: „Þetta er bara hlægilegt“

Íslenskur maður sem ákærður er fyrir stórfellt fíkniefnasmygl gefur lítið fyrir Excel-skjöl sem fundust í tölvu hans við leit lögreglu, en ákæruvaldið vill meina að í þeim sé að finna nákvæmt bókhald um fíkniefnaviðskipti. Í tölvu mannsins fundust einnig forrit til að dulkóða og læsa skjölum.

Aðalmeðferð í málinu stendur nú yfir í Héraðsdómi Reykjaness, en ásamt Íslendingnum eru tveir Hollendingar ákærðir og annar íslenskur maður. Mönnunum er gefið að sök að hafa í september 2015 staðið saman að því að flytja inn 23 kíló af sterkum fíkniefnum, en málið hefur vakið nokkra athygli vegna greindarskerðingar eins hinna ákærðu. Vísir greindi frá vitnisburði hinna mannanna í gær og í dag.

Sjá einnig: Átti ekki von á fíkniefnum heldur peningum til sumarhúsakaupa

Íslendingarnir tveir voru viðskiptafélagar

Íslendingurinn, sem handtekinn var á heimili tengdaforeldra sinna þann 28. september í fyrra, segist vera vinur og viðskiptafélagi hins Íslendingsins en hafa ekki þekkt til Hollendinganna tveggja sem einnig eru ákærðir. Íslendingarnir hefðu verið að vinna að gerð bókunarsíðu fyrir bílaleigur saman og verið staddir í Keflavík 24. september í fyrra til að ganga frá ýmsum málum varðandi það, meðal annars skoða bílaleigur á Keflavíkurflugvelli.

Sjá einnig:Á hælum Angelo dögum saman

Kassar utan um dulkóðaða Blackberry síma líkt og viðskiptafélagi hans seldi fundust um borð í bíl hans, en hann sagðist ekki kannast við að hafa haft slíkt símtæki undir höndum sjálfur, né hafa vitað að símarnir væru útbúnir sérstökum forritum til að senda dulkóðuð skilaboð.

Lögregla leitaði á heimili hins ákærða

Við leit á heimili ákærða fannst umslag sem á voru ritaðar tvær talnarunur og símanúmer, sem ákærði sagði vera númer á iKortum og símanúmerum tengdum þeim, en hann sagðist hafa lagt inn á um 20 iKort. Peningana segir hann hafa komið frá þeim ótal viðskiptum sem hann hefur staðið í, en hann hafi verið viðriðin ýmis viðskipti „síðan hann man eftir sér“, meðal annars ferðaþjónustu, vöruþróun og gjaldeyrisviðskipti.

Einnig var lagt hald á minniskort úr myndavél sem innihélt myndir af Norrænu, en fíkniefnin voru flutt til landsins um borð í bíl með farþegaskipinu, Ákærði segist ekki hafa tekið myndirnar og hafa mikið verið að lána myndavélina, meðal annars samstarfsfélaga sínum sem einnig er ákærður í málinu. Vildi hann sérstaklega vekja athygli á því að engar myndir væri að finna af honum sjálfum á vélinni.



Telja skjölin vera nákvæmt bókhald yfir fíkniefnaviðskipti

Við leit á tölvu hins ákærða fannst einnig mikið magn Excel-skjala ásamt forritunum Cloudfogger og TrueCrypt sem nota má við að dulkóða og læsa skjölum.

Saksóknari lagði fyrir ákærða hin og þessi skjöl og spurði út í tölur og nöfn á þeim, og hvort að staðist gæti að þetta væru útreikningar á útgjöldum til kaupa á fíkniefnum, en samkvæmt rannsókn lögreglu pössuðu formúlur og tölur á bak við útreikninga í skjalinu við götuverð sölueininga á fíkniefnum, nánar til tekið á amfetamíni og kókaíni.

Segir ályktanir lögreglu hlægilegar

Ákærði sagði skjölin ekki tengjast fíkniefnaviðskiptum með neinum hætti og ekki vita hvað tölurnar í þeim þýði. Ennfremur sagðist hann hafa verið mjög undrandi þegar hann var handtekinn á heimili tengdaforeldra sinna þennan dag. Ákærði segist hafa verið mjög samstarfsfús og hafa látið þá hafa alla lykla sína og lykilorð og sagt þeim frá geymslu sinni og skrifstofu í óspurðum fréttum. Aðspurður segist hann vera viðskiptafræðimenntaður og að skjölin gætu mögulega tengst verkefnum úr náminu.

„Það er hægt að taka fullt af skjölum úr tölvunni hjá einhverjum og láta þau líta tortryggilega út. Afsakið að ég segi það, en þetta er bara hlægilegt.“