Segja það þvert á boðskap Druslugöngunnar að upplýsa ekki um kynferðisbrot

Forsvarsmenn Druslugöngunnar segja það þvert á boðskap göngunnar að upplýsa ekki um kynferðisbrot á Þjóðhátíð fyrr en eftir hátíðina. Ríkislögreglustjóri segir tímabært að yfirfara leiðbeiningar um samskipti lögreglu og fjölmiðla. Æskilegt væri að samræmis væri gætt við upplýsingagjöf lögreglu.

Ákvörðun Páleyjar Borgþórsdóttur lögreglustjóra um að greina fjölmiðlum ekki strax frá þeim kynferðisbrotum sem upp kunna að koma á Þjóðhátíð í Vestmannaeyjum hefur vakið sterk viðbrögð í dag.

Langflest umdæmi lögreglu hér á landi veita fjölmiðlum upplýsingar um kynferðisbrot allt árið um kring en í leiðbeiningum ríkislögreglustjóra um samskipti lögreglu og fjölmiðla frá 2002 kemur fram að lögregla skuli meta í hvert og eitt sinn hvenær rétt sé að synja fjölmiðlum um upplýsingar.

Sjá einnig: Sjö af níu umdæmum svara fjölmiðlum.

Sigríður Friðjónsdóttir, ríkissaksóknari, sagði í samtali við Fréttastofu í dag að hún teldi æskilegt að samræmis væri gætt við upplýsingagjöf lögreglu. Haraldur Johannessen ríkislögreglustjóri sagði í skriflegu svari að leiðbeiningarnar þörfnuðust yfirferðar og væru í þeim farvegi núna vegna samfélagsmiðla, breyttra laga og reglugerða.

Talsfólk Druslugöngunnar, sem gengin verður í sjöunda sinn á laugardaginn, gagnrýnir ákvörðun lögreglunnar í Vestmannaeyjum.

Í ár verður sérstök áhersla á þörfina fyrir auknum forvörnum gegn kynferðisofbeldi í Druslugöngunni. Talsmenn göngunnar hvetja forsvarsmenn útihátíða til að taka skýra afstöðu.

„Ég skil ekki hvernig þjóðhátíðarnefnd, eða aðrir, geti svarað spurningunni hvernig Þjóðhátíð gengur ef að það á algerlega að hundsa að alvarleg kynferðisbrot eigi sér stað þar,“ segir Eva Brá Önnudóttir, talskona Druslugöngunnar.

Hjalti Vigfússon, sem einnig er talsmaður Druslugöngunnar, segir að velta megi fyrir sér hvern sé verið að vernda með því að halda upplýsingum sem þessum frá almenningi og fjölmiðlum.

„Ég held að það sé ekki verið að vernda þolendur.“

Þau hvetja forsvarsmenn Þjóðhátíðar til að taka skýrari afstöðu.

„Þetta kemur vissulega út eins og það sé fyrst og fremst verið að reyna að vernda orðspor Þjóðhátíðar á meðan að á Þjóðhátíð stendur. Þannig að allt það sem að miður fer megi ræða síðar þegar hátíðarhöldin eru búin til þess að vernda orðspor Þjóðhátíðar,“ segir Eva.

Eva segir að verið sé að senda hugsanlegum fórnarlömbum skilaboð sem stangast á við boðskap Druslugöngunnar.

„Boðskapur göngunnar hefur alltaf verið og mun alltaf vera að skila skömminni frá þolendum til gerenda. Kynferðisofbeldi eigi ekki að vera ljót leyndarmál sem ekki er hægt að ræða og það verði að vera hægt að ræða tilvist þeirra, hvenær þau eru framin og svo framvegis.“