Clarkson, Hammond og May klára fyrsta þáttinn

Fyrrum stjórnendur Top Gear, þeir Jeremy Clarkson, Richard Hammond og James May eru nú búnir að taka upp fyrsta þáttinn í nýrri bílaþáttaröð sem sýnd verður á Amazon Prime. Tökur fóru fram í S-Afríku og af myndum frá þeim sést að jeppar eiga sviðið í þættinum, en þar sjást Toyota Land Cruiser, Land Rover Defender og Mitsubishi pallbíll, enginn þeirra af nýjustu gerð.

Þessir bílar eru vafalaust heppilegir til að glíma við hrjóstrugt landslagið í S-Afríku. Á myndum má einnig sjá tjaldbúðirnar sem Amazon Prime sló upp kringum tökurnar, en á stærsta tjaldinu eru stafirnir GT í stóru letri. Þeir standa fyrir heiti nýju þáttanna, The Grand Tour, en einnig má gantast með það að ef stöfunum er snúið við, þ.e. TG, tákna þeir enn upphafsstafina í Top Gear.

Í meðfylgjandi myndbandi má sjá stemmninguna hjá þrímenningunum eftir að tökum á fyrsta þættinum var lokið og eins og fyrri daginn svífur enginn alvarleiki yfir vötnunum.