Loka­orð fram­bjóð­enda: Hvers vegna á fólk að kjósa þig sem for­seta Ís­lands?

Gengið verður að kjörborðinu í dag þar sem Íslendingar velja sér sjötta forseta lýðveldisins.

Níu eru í framboði og Fréttablaðið spurði frambjóðendurna einnar einfaldar spurningar:

Hvers vegna á fólk að kjósa þig sem forseta Íslands? 

Hildur Þórðardóttir:

„Ég stend fyrir nýjan hugsunarhátt og ný vinnubrögð, þar sem öll sjónarmið mega heyrast og svo metur hver hvað er rétt fyrir sig. Saman getum við búið til betra samfélag þar sem fólk skiptir meira máli en peningar og þar sem allir eru dýrmætir, einstakir og mikilvægir.“

Sturla Jónsson:

„Það er vegna þess að ég ætla að beita 25.gr. stjórnarskráarinnar og láta leggja frumvarp fyrir Alþingi um afnám á verðtryggingunni því það er orðið tímabært að stjórnvöld í landinu vinni fyrir almenning.“

Guðrún Margrét Pálsdóttir:

„Ég þrái að sjá þessa þjóð blómstra og verða öðrum þjóðum til blessunar. Ég er viss um að ef við hlúum að rótum okkar; tungumáli, trú, menningu og gildum, græðum upp landið okkar,  stöndum saman og biðjum fram áætlun Guðs fyrir þjóðina þá mun okkur farnast vel á þessu landi.“

 Andri Snær Magnason:

„Ég þekki eigin styrk og takmarkanir og er því fullur sjálfstrausts, sama hvert verkefnið er. Forsetaembættið á að snúast um hugmyndir og hugsjónir og samtal við þjóðina. Nýja stjórnarskráin er samtal sem var þaggað niður – við verðum einfaldlega að klára það. Ég kann líka að vera fastur fyrir og sjá hlutina skýrt – líka á ögurstundu."

Guðni Th. Jóhannesson:

„Fólkið í landinu á að kynna sér sjónarmið allra sem er í framboði og taka upplýsta ákvörðun í framhaldi af því. Nái ég kjöri vil ég vera forseti allra Íslendinga, öllum óháður og horfa bjarsýnn fram á veg en nýta auk þess reynslu liðins tíma til að láta gott af mér leiða.“

Halla Tómasdóttir:

„Vegna þess að ég mun horfa til framtíðar, hvetja, hlusta, sætta og sameina. Ég hef menntun, reynslu og manngerð í starfið og er reiðubúin að bretta upp ermar og gera gagn. Áhrifavald forseta er mikið, ég set mannlíf og náttúru í forgang og tala fyrir jafnrétti, heiðarleika, réttlæti og virðingu.“

Davíð Oddsson:

„Kjósendur sem telja mikilvægt að forseti Íslands hafi burði og þor til að taka erfiðar ákvarðanir og verja hagsmuni lands og þjóðar, vita hvaða kostir eru í boði. Á ögurstundu má dómgreind ekki bresta og þá getur reynsla og þekking á íslenskri stjórnsýslu, stjórnmálum, menningu og atvinnulífi, ráðið úrslitum.“

Elísabet Jökulsdóttir:

„Ég er heiðarleg, segi hug minn og hjarta og læt þjóðinni ekki leiðast, tendra eld á fjalli og í fjöru. Mig langar að fara í hvert hverfi í borginni og útá land og heyra hvað þjóðin er að segja. Ég Elska Ísland.“

Ástþór Magnússon:

„Nú eru mál að þróast þannig í Evrópu að hætta er talin á upplausn og jafnvel styrjöld. Ég vil afstýra því að Ísland verði skotmark í stríði stórveldanna. Þjóðin getur treyst því ég mun standa dyggan vörð um fullveldi og sjálfstæði Íslensku þjóðarinnar gegn hernaðarlegri og fjármálalegri íhlutun. Ég mun laða til landsins starfsemi tengda friðarmálum, lýðræðisþróun og náttúruvernd.“