Bruni við Grettisgötu: Skildi brennandi dýnu sína eftir í herberginu

Annar tveggja manna sem sæta ákæru Héraðssaksóknara í tengslum við brunann við Grettisgötu í mars síðastliðnum játar að hafa kveikt í húsinu með því að kveikja í slæðu á stól í herbergi sínu, henda stólnum á dýnu og skilja brennandi dýnuna eftir inni í herberginu.

Maðurinn hafði þá búið í húsinu í um það bil mánuð með bróður sínum. Báðir eru á fertugsaldri og er bróðir þess sem kveikti í einnig ákærður af Héraðssaksóknara fyrir að hafa látið hjá líða að vara við eldsvoðanum eða afstýra honum.

Sá var í herberginu þegar eldurinn kom upp en hvorki hann né bróðir hans hringdu á lögreglu eða slökkvilið. Bræðurnir tveir hafa báðir glímt við andleg veikindi og dvalið á götunni. Aðalmeðferð í máli þeirra fór fram við Héraðsdóm Reykjavíkur í dag. 

Sjá einnig: Merkileg menningarsaga Grettisgötu 87

Bróðir mannsins sem játað hefur íkveikjuna segist ekki hafa gert tilraun að slökkva eldinn, en hvorki eldvarnarteppi né slökkvitæki hafi verið í herbergi þeirra. Þá hafi hann skilið síma sinn eftir í húsinu er þeir flúðu eldinn og hafi hann ekki getað hringt á slökkvilið.

Bruninn olli miklu tjóni og meðal annars brann fjöldi verka myndlistarmannsins Halldór Ragnarssonar sem var með stúdíó í húsinu.  

Tryggingamiðstöðin hefur lagt fram einkaréttarkröfu í málinu og krafist þess að hver sem uppvís verður að því að hafa valdið brunanum, einn eða fleiri, verði dæmdur til að greiða félaginu tæplega 12,6 milljónir króna.