Manneskjulegra fangelsi á Hólmsheiði

Það var sögulegur dagur á Hólmsheiði í dag, þegar tekið var í gagnið glænýtt fangelsi, hið fyrsta sem byggt er sem slíkt síðan Hegningarhúsið árið 1874.

Á Hólmsheiði eru rými fyrir 56 fanga sem sæta gæsluvarðhaldi og einangrun auk sérstakrar álmu fyrir langtímavistun kvenna, en langtímavistun karla verður áfram á Litla-Hrauni. Innanríkisráðherra lýsti fangelsið formlega opnað í dag, þótt fyrstu fanganna sé ekki að vænta fyrr en síðsumars. Hún fagnaði tímamótunum en sagði tilfinningarnar blendnar

Stórt skref inn í nútímann

„Þetta er auðvitað fangelsi og hér koma menn og konur til að afplána refsivist, þannig að það er auðvitað mjög alvarlegur undirtónn í byggingu af þessu tagi. En það er líka mikilvægt að huga að betrunarþætti fangelsa og hér er sannarlega verið að stíga mjög stór skref inn í nútímann."

Nýja fangelsið á sér margra áratuga aðdraganda, en það var Ögmundur Jónasson sem tók fyrstu skóflustunguna á Hólmsheiði sem dómsmálaráðherra árið 2013. Ögmundur skoðaði nýja fangelsið í dag. „Þetta er mikill ánægjudagur að þessu verki skuli nú lokið og fólki sem lokað er inni skuli boðnar upp á betri og manneskjulegri aðstæður sem að þetta fangelsi sannarlega býður upp á."

Aðstaða fyrir fjölskyldufólk

Á Hólmsheiði er betur en áður hægt að aðskilja fanga eftir þörfum, bæði í mismunandi álmum og útivistarsvæðum. Þá er heimsóknaraðstaðan mun manneskjulegri en áður þekktist og meðal annars í boði lítil fjölskylduíbúð með leikvelli fyrir fanga til að umgangast börn sín.

Ónýtum fangelsum loks lokað

Páll Winkel fangelsismálastjóri segir helstu breytinguna tvíþætta. „Annars vegar erum við búin að loka fangelsum sem töldust ónýt og var ekki heimilt að loka menn inni í. Svo erum við að opna hér fangelsi sem er öruggt og mannúðlegt og við fjölgum rýmunum um 30. Þannig að það er verið að bregðast við þessum vanda og ég held við séum nokkukrn veginn komin inn í 21. öldina.“

Páll segir mannúðlega nálgun í fangelsismálum vænlegri til árangurs. „Okkar verkefni er að frelsissvipta menn, en ekki að hafa aðbúnaðinn eins ömurlegan og mögulegt er. Við getum með þessu móti dregið úr því að mönnum líði illa og hjálpað fólki að komast aftur út í frelsið.“