„Tilbúnar að taka sæti í Þjóðhagsráði“

Stjórn Félags kvenna í atvinnulífinu, FKA, kallar eftir meiri fjölbreytileika í kjölfar frétta um stofnun Þjóðhagsráðs. Þjóðhagsráð er skipað Má Guðmundssyni seðlabankastjóra, Halldóri Halldórssyni formanni sambands sveitarfélaga, Sigurði Inga Jóhannssyni forsætisráðherra, Bjarna Benediktssyni fjármálaráðherra og Þorsteini Víglundssyni framkvæmdastjóra Samtaka atvinnulífsins.

FKA segir ljóst að við stofnun Þjóðhagsráðs séu stjórnvöld ekki að fara eftir jafnréttislögum sem nú eru í gildi. Bendir FKA að í 15. grein laganna segi að skipun í nefndir, ráð og stjórnir á vegum ríkis og sveitarfélaga skuli að því gætt að hlutfall kynjanna sé sem jafnast og ekki minna en 40 prósent þegar um fleiri en þrjá fulltrúa er að ræða. Í Þjóðhagsráði sitja hins vegar fimm karlmenn.

„Með ályktun þessari vill FKA benda stjórnvöldum á að innan vébanda FKA og hvarvetna um okkar fjölbreytta samfélag, eru hundruð kvenna í startholunum, tilbúnar að taka að sér ábyrgð, tilbúnar að leggja hönd á plóg og tilbúnar að taka sæti í Þjóðhagsráði,“ segir í ályktun stjórnarinnar. Skorar stjórnin á stjórnvöld að bregðast við þeirri gagnrýni sem ályktun þeirra felur í sér.

„Fjölbreytni er grundvallar forsenda þess að góðar ákvarðanir séu teknar með þarfir heildarinnar að leiðarljósi.“

Lesa ályktunina í heild hér fyrir neðan:

Konur í startholunum fyrir Þjóðhagsráð

Stjórn FKA – Félag kvenna í atvinnulífinu kallar eftir meiri fjölbreytileika í kjölfar frétta um stofnun Þjóðhagsráðs, kom stjórn FKA saman í dag og fjallaði um málið.

Niðurstaða fundarins er neðangreind ályktun.

Ljóst er að við stofnun Þjóðhagsráðs eru stjórnvöld ekki að fara eftir jafnréttislögum nr.10/2008 sem eru í fullu gildi. Þar segir í 15. grein laganna að skipun í nefndir, ráð og stjórnir á vegum ríkis og sveitarfélaga skuli að því gætt að hlutfall kynjanna sé sem jafnast og ekki minna en 40% þegar um fleiri en þrjá fulltrúa er að ræða, í Þjóðhagsráði sitja hins vegar fimm karlmenn.

Með ályktun þessari vill FKA benda stjórnvöldum á að innan vébanda FKA og hvarvetna um okkar fjölbreytta samfélag, eru hundruð kvenna í startholunum, tilbúnar að taka að sér ábyrgð, tilbúnar að leggja hönd á plóg og tilbúnar að taka sæti í Þjóðhagsráði. FKA eflir kraft atvinnulífsins, er leiðandi hreyfiafl sem gerir leiðtogum kleift að sækja fram í fjölbreyttu atvinnulífi. FKA er öflugt tengslanet athafnakvenna úr öllum geirum atvinnulífsins, sem sameinar þær til aukins sýnileika og þátttöku. Er meðal annars bent á þau hundruð nafna sem birt eru á vefsíðu FKA og lista upp konur úr atvinnulífinu, sem hafa boðið sig fram til stjórnarstarfa og bera til þess margvíslega reynslu af stjórnun og rekstri.  https://www.fka.is/felagatal/#stjorn

Stjórn FKA skorar hér með á stjórnvöld að bregðast við þeirri gagnrýni sem ályktun þessi felur í sér, fjölbreytni er grundvallar forsenda þess að góðar ákvarðanir séu teknar með þarfir heildarinnar að leiðarljósi.

Tökum þátt í því að breyta til batnaðar og vera til fyrirmyndar.

Stjórn FKA

Reykjavík 13. júní 2016.