Þægileg og töff barnaföt

Hörpu Sif Eyjólfsdóttur, doktorsnema í lýðheilsufræði, og Rósu Björk Sigurgeirsdóttur, nema í mastersnámi í stjórnun við Stockholms University og starfsmanni hjá sprotafyrirtækinu Looklet, fannst þörf á fötum sem væru á góðu verði, en sömuleiðis úr endingargóðu efni þegar þær áttu von á barni. Þá fór Harpa að sauma fyrir væntanlegt krílið og í kjölfarið fyrir vini og ættingja. Fljótlega fór það að vinda töluvert upp á sig og við það varð Charmtrolls Design til fyrir um einu ári.

„Okkar sýn er að öll föt séu fyrir öll börn óháð kyni og við markaðssetjum ekki stráka- eða stelpuföt, heldur einfaldlega barnaföt. Við saumum allt heima í stofu og seljum aðeins í gegnum heimasíðuna charm­trolls.tictail.com og höldum þannig verðinu viðráðanlegu fyrir foreldra ungra barna,“ útskýrir Harpa en hún sér um hönnun fatanna og saumaskap, en Rósa sinnir bókhaldi fyrirtækisins.

Þægindin í fyrirrúmi

Harpa hefur saumað lengi, í raun síðan hún var barn, en þá saumaði hún með móður sinni. „Ég hef alltaf látið hugmyndaflugið ráða og ekki verið að binda mig við snið. Mörgum klukkustundum hefur verið eytt síðustu tvö árin við saumavélarnar en Rósa er að læra óðfluga.“

Þær segjast ekki pæla mikið í tísku og tískustraumum við hönnun barnafatanna heldur hanna þær og sauma það sem þeim finnst fallegt hverju sinni. „Þægindi eru í algjöru fyrirrúmi, það eru börn sem klæðast fötunum og þau þurfa að geta hreyft sig hindrunarlaust. Þá handveljum við öll efni og reynum að nota aðeins lífræn efni sem hafa fengið gæðastimpil (OEKO-TEX) á öllum stigum í framleiðslunni,“ segir Harpa.

Rósa bætir við að barnið þeirra sé vítamínsprauta fyrirtækisins og haldi þeim á tánum. „Barnið okkar er okkar stærsti innblástur, hún er mjög sterkur og svalur karakter og fötin bera þess merki líka en þau eru frekar töff og kúl að okkar mati. Barnið er mikill orkubolti og þá verður enn þá mikilvægara að fötin séu endingargóð og þægileg,“ segir hún og brosir.

Draumurinn að flytja heim

Harpa segir erfitt að segja til um hver sé eftirlætisflíkin af þeim sem hún hefur hannað. „Bæði stuttermabolurinn sem við gerðum fyrir sumarið og klofsíðu har­em-buxurnar eru í miklu uppá­haldi. Stuttermabolurinn er síðari að aftan, með upprúlluðum ermum og ófrágengnum endum – rokkaralegur og flottur. Harembuxurnar eru með skemmtilegum vasa að framan og ótrúlega þægilegar fyrir börnin.“

Spurðar út í nafnið á hönnuninni segja þær það hafa verið í raun algjöra tilviljun hvernig það kom til. „Við rákumst á mynd þar sem undir stóð á sænsku „lilla charmtrollen“. Við höfðum þá verið að reyna að finna nafn sem gæfi til kynna að um barnamerki væri að ræða og þetta passaði fullkomlega.“

Fjölskyldan býr í Stokkhólmi þar sem þær Harpa og Rósa hafa búið síðastliðin fimm ár. „Okkur líður rosalega vel í Svíþjóð og erum ekkert á leiðinni heim næstu fimm árin eða svo. Draumurinn er þó að flytja heim til Íslands á endanum.“