Algjör B-manneskja

Þessi annasama helgi hjá Hauki Heiðari hófst á fimmtudagskvöld þegar Dikta spilaði á Secret Solstice hátíðinni. Í gær sá hann Radiohead spila og í kvöld ætlar hann ekki að missa af Deftones. „Já, það er mikið að gerast þessa helgi eins og vanalega. Ég verð líka að syngja í tveimur brúðkaupum og missi að sjálfsögðu ekki af leik Íslands og Ungverjalands í dag. Svo þarf ég að klára að ganga frá tveimur barnabókum fyrir bókafyrirtækið okkar, Rósakot.“

Haukur Heiðar leyfir lesendum hér að heyra hvernig dæmigerð helgi er hjá honum.

Hver er óskamorgunmaturinn um helgar? Það er fátt betra en að fara í góðan brunch á Geysi með konu og börnum og fá sér einn cappuccino með þó maður geri það mun sjaldnar en maður vildi.

Hver er yfirleitt helgarmorgunmaturinn? Ég fæ mér nú vanalega bara hafragraut með krökkunum eða brauð með osti.

Þegar þú ferð út að skemmta þér hvað finnst þér skemmtilegast að gera? Ég get ekki sagt að ég eigi mér neinn uppáhalds skemmtistað. Best finnst mér bara að vera í góðra vina hópi, sama svo sem hvar eða hvenær það er.

Sefur þú út um helgar? Ég vakna nú oftast með börnunum og leyfi konunni minni að sofa út. True story. Það kemur sárasjaldan fyrir að ég sofi út.

Uppáhalds helgarmaturinn? Grillaðar nautalundir og gott rauðvín með.

Hvar er best að borða hann? Heima í góðra vina hópi.

Vakir þú frameftir? Já, ég verð nú því miður að viðurkenna að ég vaki alltof oft frameftir að klára verkefni dagsins eða æfa mig fyrir næsta dag. Er og hef alltaf verið algjör B manneskja en samt ekki, því ég sef aldrei út. En þegar mikið er að gera, þá þarf maður einhvers staðar að finna tíma og því miður er það oft svefninn sem fær að gjalda fyrir það.

Ef þú ferð út að dansa hvert ferðu þá? Eins og þeir sem þekkja mig vita, þá er dans ekki mín sterkasta hlið. Ég er betri í öðru. Ætli ég dansi ekki bara helst á hljómsveitaræfingum?

Hvernig er draumahelgin? Að vera í fríi frá vöktum og með ekkert planað. Endalaust af fótboltaleikjum í gangi, Liverpool, FH og Ísland eru að keppa. Og vinna öll að sjálfsögðu.

Ef þú ert næturhrafn færðu þér eitthvað í gogginn á kvöldin? Nei, yfirleitt læt ég það nú vera að borða á kvöldin. Það væri þá helst svartur kaffibolli.

Ertu með nammidag? Hvaða nammi færðu þér? Börnin halda mikið upp á laugardaga og stundum leyfir maður sér eitthvað þá líka. Þessa dagana reyni ég samt að halda mig frá slíku. En súkkulaði er óþolandi gott.

Hvar er best að eyða laugardagseftirmiðdegi? Á laugardagseftirmiðdegi er ekkert betra en að vera heima í rólegheitunum.

Með hverjum er best að hanga um helgar? Konunni minni.

Hvað verður í sunnudagskaffinu? Ef ég svara pönnukökur með rjóma og sultu og það kemur í blaðinu, verður það þá ekki örugglega að veruleika?

Hvað er annars að frétta? Á mánudagsmorgun neglum við Diktu menn út á flugvöll og fljúgum til Noregs að spila þar á tónlistarhátíð. Og svo heldur sumarið áfram, helgi eftir helgi eftir helgi. ÁFRAM ÍSLAND!