Hornacek fékk starfið hjá Knicks

Þjálfaraleit NBA-liðsins NY Knicks er lokið en búið er að ráða Jeff Hornacek sem næsta þjálfara.

Hinn 53 ára Hornacek verður fimmti þjálfari liðsins á síðustu sex árum. Hann er annar þjálfarinn sem forseti félagsins, Phil Jackson, ræður til liðsins.

Hornacek hefur samþykkt þriggja ára samning við Knicks og fyrir þann samning fær hann tæpa 2 milljarða íslenskra króna.

Hornacek lék lengstum með Utah Jazz á ferli sínum sem leikmaður. Hann var svo aðstoðarþjálfari liðsins frá 2011 til 2013. Þá fór hann til Phoenix þar sem hann þjálfaði í þrjú ár eða þar til í febrúar síðastliðnum er hann var rekinn.