Vill hætta við blokkina og reisa hótel í staðinn

Einn eigenda Borgar­túns 28 í Reykjavík óskar eftir því að fá að byggja 88 herbergja hótel á lóðinni.

Samkvæmt deiliskipulagi sem samþykkt var að beiðni fyrri lóðarhafa 17. mars í fyrra var heimilað að bæta einni hæð við húsið og stækka það um 750 fermetra. Fram kemur í bréfi lögmanns núverandi lóðarhafa, HEK hf., að mælt hafi verið fyrir um íbúðabyggingu með verslun á jarðhæð í stað verslunar- og þjónustubyggingar samkvæmt fyrra skipulagi. Þessi breyting hafi hins vegar verið kærð og sé til meðferðar hjá úrskurðarnefnd umhverfis- og auðlindamála.

„Helstu breytingar samkvæmt tillögu lóðarhafa snúa því að nýtingu fyrirhugaðs húss á þá leið að það hýsi fyrrnefnt hótel í stað 22 íbúða og verslunar/þjónustu á jarðhæð,“ segir í bréfi Fjeldsted & Blöndal lögmannsstofu.

„Þær tillögur lóðarhafa, sem fram koma í fyrirspurninni, fela það í sér að heimild verði fengin fyrir byggingu hótels á fimm hæðum sem rúma muni um 80 til 88 hótelherbergi. Ekki er lagt til að breyting verði á heildarbyggingamagni á lóðinni,“ segir í bréfinu þar sem spurst er fyrir um það hjá skipulagsfulltrúa borgarinnar hvort heimild fáist fyrir hótelbyggingunni.

„Í raun fellur bygging hótels mun betur að áætlunum í aðalskipulagi en fyrirhuguð íbúðabygging samkvæmt núgildandi deiliskipulagi, enda liggur fyrir að fyrst og fremst er gert ráð fyrir verslunar- og þjónustustarfsemi á skipulagssvæðinu og eru hótel sérstaklega nefnd í því sambandi,“ er fullyrt í fyrirspurninni.

Þá er ítrekað að hvorki lagaleg rök né gildandi skipulagsáætlanir standi í vegi fyrir því að fallist verði á tillöguna.

„Fyrirhuguð breyting er í fullu samræmi við aðalskipulag og aðrar skipulagsáætlanir á svæðinu. Þá er hvergi að finna starfsemiskvóta um hámarkshlutfall gististarfsemi á svæðinu í aðalskipulagi eða deiliskipulagi. Slíkir kvótar hafa verið settir á tiltekin svæði í miðborginni í því skyni að takmarka fjölda hótelbygginga þar sem talin hefur verið þörf á að grípa í taumana.“



Fréttin birtist fyrst í Fréttablaðinu 8. júní 2016