Vilja heimila ökupróf á sjálfskiptum vöru- og hópbílum af minni gerð

Heimilt verður að taka próf á sjálfskiptum vöru- og hópbílum af minni gerð nái breyting innanríkisráðuneytisins á reglugerð um ökuskírteini fram að ganga. Á vef ráðuneytisins er óskað eftir umsögnum um drögin til og með 23. júní næstkomandi. 

Með breytingu á reglugerðinni um ökuskírteini verður heimilt að kenna og prófa á sjálfskiptar bifreiðar í C1 og D1- flokki, sem eru minni gerðir vöru- og hópbíla, en réttindin verða þá takmörkuð við akstur sjálfskipta bifreiða í þessum flokkum. Þessi heimild er nú þegar í ökutækjaflokkum C og D, þ.e. fyrir stærri vöru- og hópbifreiðar.

Í tilkynningu frá ráðuneytinu kemur fram að bifreiðar í dag eru flestar með sjálfskiptingu og er því lagt til í drögunum að valkvætt verði hvort próf er tekið á sjálfskipta eða beinskipta bifreið og fá útgefin ökuréttindi í samræmi við það. Ef próf er tekið á sjálfskipta bifreið er síðar hægt að bæta við réttindum á beinskipta ef tekið er verklegt próf. Í Noregi og Svíþjóð er fyrirkomulagið á þann hátt sem hér hefur verið lýst.