Lilja ræðir mannúðarmál á sex þúsund manna fundi í Istanbúl

Lilja Alfreðsdóttir utanríkisráðherra sækir á morgun leiðtogafund um mannúðarmál í Istanbúl í Tyrklandi. Undirbúningur fundarins hefur staðið yfir í þrjú ár en hann sækja um sex þúsund fulltrúar ríkisstjórna, stofnana og fyrirtækja.

Í tilkynningu frá utanríkisráðuneytinu segir að á leiðtogafundinum verði kallað eftir því að ríki heimsins lýsi yfir stuðningi við ákveðnar aðgerðir eða skuldbindingar sem miði að því að skila árangri á sviði mannúðar- og neyðaraðstoðar.

Angela Merkel Þýskalandskanslari er eini fulltrúi G7-samtakanna svokölluðu sem hefur boðað komu sína en Vladimír Pútin Rússlandsforseti hyggst sniðganga fundinn.

„Flóttamannavandinn nú er einhver sá mesti í sögunni og tugir milljóna manna eru á flótta vegna ófriðar í heimalandi sínu, náttúruhamfara, sárrar fátæktar eða áhrifa loftslagsbreytinga,“ er haft eftir Lilju í tilkynningunni.

„Það er mjög brýnt að þjóðir heims stilli saman sína strengi, rýni skipulag og þá aðferðafræði sem unnið er eftir með það að markmiði að ná betri árangri.“