Gagarín fer með himinskautum og lagði Google

Margmiðlunarfyrirtækið Gagarín hlaut gullverðlaun í flokki stafrænnar hönnunar í samkeppni á vegum European Design Awards 2016 fyrir orkusýningu Landsvirkjunar „ Orka til framtíðar“ í Ljósafossstöð.

Gagarín hefur hreppt fjölda verðlauna og viðurkenninga á undanförnum árum og virðist ekkert lát á því. Velgengni fyrirtækisins á alþjóðavettvangi hættir að heyra til tíðinda. Það sem vekur athygli í tengslum við þessi tilteknu verðlaun er sú staðreynd að það er stórfyrirtækið Google sem er í öðru sæti.

„Þetta er hálf ... ótrúlegt eitthvað,“ segir Kristín Eva Ólafsdóttir hönnunarstjóri Gagarín: „En, einstaklega gaman og viðurkenning á því að við erum samkeppnisfær úti í hinum stóra heimi.“

Landsvirkjun hlýtur að fagna því sérstaklega að hafa fengið Gagarín til liðs við sig, við að setja upp þessa rómuðu sýningu en í henni eru gestir leidd­ir inn í heim raf­orkunn­ar á nýj­an og skap­andi máta. Sýningin var formlega opnuð á 50 ára afmæli Landsvirkjunar sumarið 2016 og er opin alla daga frá 10-17. Gaga­rín og Tví­horf arki­tekt­ar eru hönnuðir sýn­ing­ar­inn­ar og komu fjöldi fyr­ir­tækja og sér­fræðinga að sýn­ing­unni. Fyrr á árinu hlaut sýningin fyrstu verðlaun Félags íslenskra teiknara í flokknum „gagnvirk miðlun og upplýsingahönnun“.

European Design Awards er samstarfsverkefni 16 evrópskra hönnunartímarita og 9 bloggsíðna, sem öll eru framarlega á sínu sviði og dómnefndina skipa fulltrúar þeirra. Fulltrúar Gagarín tóku á móti verðlaununum síðastliðna helgi á veglegri hátíð í Austurríki en þetta er þriðja árið í röð sem fyrirtækið er verðlaunað á þessari hátíð.

Tvenn verkefni hlutu silfurverðlaun í sama flokki en það var gestastofa Google í Dublin og norðurljósaverkefni sem unnið var fyrir ferðagátt Noregs „Visit Norway“. Leturfyrirtækið Monotype hlaut bronsverðlaun fyrir gagnvirka leturinnsetningu.