Framkvæmdastjóri Hendrix segir aðgerðir lögreglu ólögmætar og hyggst kæra

Haukur Vagnsson, framkvæmdastjóri skemmtistaðarins Hendrix, segir aðgerðir lögreglu í nótt hafa verið ólögmætar. Lögreglu hafi ekki tekist að færa sönnur á að inni á staðnum væri fólk undir aldri og hyggst leggja fram kæru vegna málsins. Staðnum var lokað og hann rýmdur í nótt.

„Ég tel að lokunin sé algjörlega ólögmæt. Mér skilst að lögregla hafi tekið einhverja þrjá sem voru undir tvítugu með glas einhvers staðar nálægt sér. En það kaupir enginn áfengi á barnum sem eru undir tvítugu,“ segir Haukur í samtali við Vísi.

Lögregla sendi frá sér í tilkynningu í morgun þess efnis að skemmtistað í Höfðahverfi hafi verið lokað upp úr miðnætti í nótt eftir að upp komst að inni á staðnum hafi verið fólk undir aldri með áfengi við hönd. Aldurstakmark inn á staðinn er átján ára á föstudögum.

„Þegar við erum með átján ára aldurstakmark inn þá fá þeir sem eru yfir tvítugt armband sem þeir þurfa að sýna til þess að geta keypt áfengi á barnum. Allir sem koma inn eru spurðir um skilríki og ég get staðfest það með öryggismyndavélum,“ segir Haukur. Hins vegar geti staðurinn ekki borið ábyrgð á því að þeir sem yngri séu drekki ekki inni á staðnum.

„Ég get ekki fylgst með því hvort einhver fái sér sopa hjá einhverjum öðrum, eða þá að einhver hafi keypt áfengi fyrir einhvern sem má ekki kaupa. Ef við þyrftum að fylgjast með því þyrfti ég að vera með 400 manns í eftirliti,“ segir hann.

Haukur gagnrýnir löggjöfina. „Löggjöfin er svo afspyrnu slæm og gerir okkur svo erfitt fyrir. Krakkar sem eru átján ára mega gifta sig, mega kjósa en ekki kaupa sér áfengi. Þeir mega fara inn á skemmtistaðinn en ekki versla sér vín á barnum. Þetta verður bara til þess að ungir krakkar leita frekar í fíkniefni því það er auðveldara að nálgast þau en áfengi.“

Jafnframt kom fram í tilkynningu lögreglu að rekstur staðarins hafi verið stöðvaður, sem Haukur segir ekki rétt. Hann hafi enga áminningu fengið og að staðurinn verði áfram opinn í kvöld, líkt og önnur kvöld. Haukur segist búinn að ræða við lögreglu vegna málsins. „Ég geri ráð fyrir að kæra þetta,“ segir hann.