Sakar stjórn rammaáætlunar um ósæmandi málsmeðferð

Orkustofnun gagnrýnir verkefnisstjórn rammaáætlunar harðlega, sakar hana um lögbrot og ósæmandi málsmeðferð, með því að sópa virkjanakostum undir teppi og halda þeim þannig leyndum gagnvart Alþingi. 

Rammaáætlun er helsta verkfæri stjórnvalda til að meta hvort svæði eigi að virkja til orkuöflunar eða vernda. Þegar verkefnisstjórn kynnti tillögudrög sín fyrir þremur vikum fengu þau jákvæð viðbrögð frá náttúruverndarsamtökum, Landsvirkjun taldi hins vegar farið á svig við lög þar sem ekki hefði verið horft til jákvæðra efnahags- og samfélagslegra áhrifa virkjana, heldur eingöngu til neikvæðra áhrifa.

Orkustofnun tekur undir gagnrýni Landsvirkjunar og segir mikla brotalöm í málsmeðferð verkefnisstjórnar. 

„Við líka gagnrýnum mjög hart að það hefur ekki verið tekið tillit til loftlagsmálanna í þessu. Umhverfismál eru skoðuð út frá mjög þröngum íslenskum hagsmunum,” segir Guðni A. Jóhannesson orkumálastjóri í viðtali í fréttum Stöðvar 2.

Hann segir verkefnisstjórn hafa sleppt því að fjalla um 55 virkjanakosti af þeim 82 sem lagðir voru fyrir hana. 

„Og er í raun og veru ekki sagt frá því í niðurstöðum nefndarinnar, frá þessum virkjunarkostum, heldur haldið leyndum fyrir Alþingi. Og við skiljum ekki hvernig þetta getur staðist lög.” 

Guðni kveðst líta það mjög alvarlegum augum að verkefnisstjórnin fari ekki að lögum. Hann kveðst þó gera sér grein fyrir því að stundum þurfi að forgangsraða vegna tímaskorts og naumra fjármuna en það þurfi þá að gerast á málefnalegum grundvelli og með því að setja einstaka kosti í biðflokk.

„En að sópa kostum undir teppi, - það er í raun og veru málsmeðferð sem er ekki sæmandi í stjórnsýslunni,” segir orkumálastjóri. 

Hér má lesa athugasemdir Orkustofnunar.