Tveir liggja þungt haldnir á gjörgæsludeild

Tveir liggja alvarlega slasaðir á gjörgæsludeild Landspítalans eftir slys í gær. Karlmaður á tvítugsaldri liggur þar þungt haldinn eftir bílslys á Holtavörðuheiði klukkan sex að morgni í gær. Þyrla Landhelgisgæslunnar sótti manninn á slysstað og flutti hann til höfuðborgarinnar.

Á sjötta tímanum í gær barst beiðni til Landhelgisgæslunnar vegna vélsleðamanns sem slasaðist alvarlega nálægt Hrafntinnuskeri. Sá var fluttur á Landspítalann þar sem hann liggur alvarlega slasaður.

Þá var karlmaður á sextugsaldri fluttur á Landspítalann eftir að hafa slasast þegar fólksbíll og jeppi skullu saman á Vesturlandsvegi skammt frá Tungufossi um fimm leytið í gær. Var maðurinn lagður inn á gjörgæsludeild en ástand hans er sagt stöðugt.