Jakob svekktur út í sjálfan sig

Jakob Sigurðarson og félagar í Borås Basket eru komnir í sumarfrí eftir fjórða tapið á móti Södertälje Kings. Jakob fór inn á fésbókina eftir leikinn og þakkaði öllum fyrir tímabilið.

Borås Basket tapaði síðasta leiknum með aðeins tveimur stigum á útivelli en einvíginu 4-1 samanlagt.

Jakob Sigurðarson fann sig ekki í lokaleiknum og skilaði aðeins 2 af 11 skotum sínum í körfuna. Hann endaði með 5 stig og 3 fráköst.

Jakob viðurkenndi það í færslu sinni að hann væri svekktur út í sjálfan sig en jafnframt að hann ætlaði að koma sterkur til baka.

„Ég vil þakka öllum sem komu að Borås Basket liðinu á þessu tímabili. Það hefur verið magnað að sjá hversu vel allir hafa tekið á móti mér og fjölskyldu minni hjá klúbbnum. Ég er mjög þakklátur fyrir það," sagði Jakob sem var að klára sitt fyrsta tímabil með Borås Basket.

„Ég er mjög vonsvikinn með sjálfan mig í þessum lokaleik en ég hef bæði hitt úr og klikkað á þessum skotum mörgum sinnum á ferlinum og veit hvernig ég á að bregðast við. Ég trúi á Borås Basket og er viss um að góðir hlutir munu gerast á næsta tímabili. Við verðum tilbúnir," sagði Jakob Sigurðarson sem hélt upp á 34 ára afmælið sitt á dögunum.

Jakob spilaði alls 39 leiki með Borås Basket á tímabilinu og var með 15,6 stig, 2,9 fráköst og 1,7 stoðsendingar að meðaltali í þeim. Hann kom til Borås eftir að hafa leikið með Sundsvall Dragons frá 2009 til 2015.

Jakob varð einmitt sænskur meistari á sínu öðru ári með Sundsvall Dragons vorið 2011 og það verður því fróðlegt að sjá hvað gerist á næsta tímabili.