Jakob og félagar í vondum málum

Jakob Örn Sigurðarson og félagar í Borås Basket eru í erfiðum málum eftir 64-93 tap fyrir Södertälje Kings á heimavelli í fjórða leik liðanna í undanúrslitum sænsku úrvalsdeildarinnar í körfubolta í dag.

Södertälje leiðir einvígið 3-1 og Borås þarf því að vinna þrjá leiki í röð til að tryggja sér sæti í lokaúrslitum.

Jakob hafði hægt um sig í dag en landsliðsmaðurinn skoraði tvö stig, tók fjögur fráköst og gaf tvær stoðsendingar. Jakob hitti aðeins úr einu af átta skotum sínum í leiknum.

Fimmti leikur liðanna fer fram á mánudaginn og þar þurfa að Jakob og félagar að vinna ætli þeir sér ekki að fara í sumarfrí.