Eigi veit eg hverjir flytja munu lag mitt

Hvernig kom það til, Úlfhildur, að þú tókst þátt í Upptaktinum? Frænka mín var með í hittifyrra, ég fór á tónleikana þá og ákvað að vera með á næsta ári og senda inn lag. Ég var því með lag bæði í fyrra og núna.

Ingibjörg Ýr Skarphéðinsdóttir tónskáld er að hjálpa mér að fullvinna lagið áður en það verður flutt í Hörpu á barnamenningarhátíðinni, það fylgdi með í pakkanum.

Hvað heitir lagið og hvernig mundir þú lýsa því? Það heitir Víkingr og lýsir stemningunni þegar ungir menn sigldu í víking til annarra landa, fullir af ævintýraþrá.

Fyrir hvaða hljóðfæri er það? Það er útsett fyrir strengi, fiðlu, lágfiðlu, selló og kontrabassa.

Veistu hver flytur lagið á tónleikunum í Hörpu? Nei, eigi veit eg hverjir flytja munu lag mitt! – en tónleikarnir verða 19. apríl klukkan fimm.

Hefur þú prófað að semja lög áður? Já, já, oft og mörgum sinnum.

Á hvaða hljóðfæri spilar þú? Ég spila á trompet, byrjaði að læra á hann þegar ég var ára.

Spilar þú oft opinberlega? Já, af og til. Ég spila til dæmis í Stórsveit skólahljómsveita Reykjavíkur, með Skólahljómsveit Mið- og Vesturbæjar, hef spilað í leiksýningu í skólanum og við ýmis önnur tækifæri.

En hvernig tónlist hlustar þú mest á? Alls konar tónlist nema mér leiðist tískupopp nútímans.

Hvað gerir þú helst í frístundum? Ég syng í kór og er í sirkusskóla. Svo er ég að æfa mig á bæði gítar og píanó sjálf.

Ertu búin að plana hvað þú gerir skemmtilegt í sumar? Ég er að fara til Belgíu á kóramót með kórnum mínum.