Zlatan með þrennu og PSG með 25 stiga forystu

Zlatan Ibrahimovic skoraði þrjú mörk fyrir PSG þegar liðið bætti enn í forskot sitt í frönsku úrvalsdeildinni í knattspyrnu í dag. PSG vann Nice 4-1 á heimavelli og er nú með 25 stiga forskot á Monaco.

Zlatan skoraði sem fyrr segir þrennu en brasilíski varnarmaðurinn David Luiz skoraði eitt mark í leiknum. Fyrir Nice skoraði Hatem Ben Arfa, fyrrum leikmaður Newcastle og Hull City, eina markið þegar hann jafnaði metin í 1-1.

Monaco tapaði hins vegar á heimavelli í gær fyrir Bordeaux, 1-2. Úrslitin í frönsku deildinni eru löngu ráðin en PSG situr á toppi deildarinnar með 80 stig. Í öðru sæti er Monaco með 55 stig og Nice er í því þriðja með 50 stig.