Strigaskórinn ein skemmtilegasta hönnunarvara sem hægt er að kaupa

Nú virðist sem strigaskór séu aftur komnir í tísku eftir að hafa verið lítið áberandi síðustu árin. Erlendis hafa þessir skór verið afar vinsælir og gengið kaupum og sölum í að verða tvo áratugi eða allt frá því að Air Jordan setti í fyrsta sinn á markað skó sem ekki voru ætlaðir til íþróttaiðkunar.

Úti í heimi myndast jafnan langar raðir fyrir utan verslanir þegar vinsælar týpur koma í sölu en slíkt hefur ekki tíðkast hér á landi. Þetta breyttist þó fyrir um mánuði, þegar það myndaðist röð fyrir utan tískuvöruverslunina Húrra Reykjavík í tengslum við sölu verslunarinnar á skónum Yeezy Boost 350 frá Adidas og mun það vera í fyrsta sinn sem slíkt á sér stað hér á landi.

Rapptónlist uppsprettan

Logi Pedro Stefánsson, tónlistarmaður og tískufrömuður, safnar strigaskóm og spurður um ástæðuna fyrir því að þessir skór eru eins eftirsóttir og raun ber vitni segir hann: „Strigaskórinn er ein skemmtilegasta hönnunarvara sem hægt er að kaupa. Strigaskórinn hefur verið partur af tískustraumum síðustu áratuga og poppkúltúr almennt. Allt frá því að það var stigið á glænýja Nike Jordan 4s í klassískri '90s mynd Spike Lee, Do The Right Thing, og að nútímanum þar sem tónlistarmaðurinn Kanye West fær fólk til þess að tjalda í Everest-aðstæðum marga daga í röð til þess að eignast par með hans hönnun.“ 

En hver er ástæðan fyrir því að þessi tíska hefur verið að sækja í sig veðrið síðustu misseri?

„Þetta tengist uppreisn æru rapptónlistar í vestrænum kúltúr. Strigaskór hafa verið ein helsta tískuvara svartra Ameríkumanna síðustu áratugi. Og er því ekki furða að þegar rapptónlist er orðin meira samþykkt í vestrænum heimi að þessi tískuáhugi smitist lengra áfram. Öll helstu tískuhús heimsins hafa t.d. verið með strigaskó í sínum fatalínum síðustu ár.“

Milljarðs dollara bransi

Endursölumarkaður með strigaskó er metinn á um milljarð dollara en ekki hefur mikið borið á því að slík viðskipti séu stunduð hér á landi. Það mátti þó sjá nokkrar auglýsingar á sölusíðunni Brask og brall á Facebook nú á dögunum, þar sem nokkrir aðilar freistuðu þess að selja Yeezy Boost-skóna sína. Þar voru skórnir þó búnir að hækka töluvert í verði; fóru úr tæpum 30 þúsund krónum í yfir 100 þúsund krónur. 

Björn Geir Másson er búsettur í Bandaríkjunum og þekkir nokkuð vel inn á endursölumarkaðinn. Hann vinnur í verslun sem sérhæfir sig í endursölu á strigaskóm. Verslunin kaupir skó af fólki, oftast skó sem hafa aldrei verið notaðir, og selur þá síðan aftur á örlítið hærra verði.

Starf hans felur meðal annars í sér að vega og meta ástand skópara sem koma inn til sölu, ganga úr skugga um hvort þau séu nokkuð fölsuð og ákveða út frá því hvaða verð fólk fær síðan fyrir skóna. Þar skiptir miklu máli að vera meðvitaður um verðmæti parsins og finna sanngjarnt verð út frá því.

Björn segir verð geta verið allt frá 200-300 dollurum (25-40 þúsund krónum) og yfir í 7.000 dollara (tæpar 900 þúsund krónur) en það kostuðu dýrustu skórnir sem hann persónulega hefur fengist við – verðið getur farið upp í margar milljónir en dýrustu Air Jordan-skór allra tíma seldust á um 12 milljónir króna. Það er því alveg ljóst að í þessum bransa eru miklir peningar.