Óþarfi að teygja vinnu yfir helgidaga

Víða voru verslanir og veitingastaðir opnir í gær, föstudaginn langa, en slíkt var áður bannað. Til að mynda var opið í fimm verslunum Krónunnar og á Domino’s. Séra Geir Waage, sóknarprestur í Reykholti, segir óþarft að hafa opið á hátíðardögum. „Fólk á að hafa frí til að njóta þessara hátíðardaga,“ segir Geir og vísar til jóladags, páskadags og föstudagsins langa.

Geir segir neytendur vel geta búið sig undir þessa daga og birgt sig upp með því sem þá vantar. Þá segir hann gott fyrir fólk sem mannar þá vinnustaði sem opnir eru að fá frí og rétta úr sér annað slagið.

„Mér finnst þetta fyrst og fremst vera óþarfi. Þetta eru helgustu dagar ársins. Það er alveg óþarfi að vera að teygja þessa vinnuþrælkun á fólki yfir á þessa daga,“ segir Geir.