Segir markaðshorfur mjög góðar fyrir sólarkísil í Kína

Markaðshorfur fyrir sólarkísilframleiðslu á Grundartanga eru mjög góðar, segir forstjóri Silicor Materials, sem vonast til að ljúka fjármögnun slíkrar verksmiðju í sumar.

Ráðamenn Silicor stefna að því að geta hafið framkvæmdir í haust við sólarkísilverksmiðju á Grundartanga en fram hefur komið í fréttum að fyrirtækið á eftir að tryggja sér um helming þeirra 80 megavatta raforku sem verksmiðjan þarf.

Henni er ætlað að hreinvinna kísil til nota í sólarflögur og er ætlunin að selja megnið af framleiðslunni til Kína. Efnahagssamdráttur í Kína veldur forstjóra Silicor þó ekki áhyggjum. 

„Sú grein sem sagt er að muni halda áfram að vaxa er sólarkísill. Allt bendir til að ekki verði neinn samdráttur í þessari grein þar og notendahópur okkar er að mestu þar,“ segir Terry Jester, forstjóri Silicor, í viðtali í fréttum Stöðvar 2. 

Spár geri ráð fyrir að markaður fyrir sólarkísil haldi áfram að vaxa, bæði í Kína sem og annarsstaðar í heiminum.

„Þrátt fyrir samdrátt í stáli og öðrum rekstri sem byggist á hrávöru eru menn enn mjög bjartsýnir á sólarkísilinn.“

Þá segir Terry Jester að fjármögnun sé á lokastigi. 

„Við erum að ganga frá stórum hluta fjármögnunarinnar, við erum að vinna í hlutafénu, nokkrir stórir fjárfestar munu skrifa undir lánsloforð á næstu vikum. Um það leyti munum við vinna að því að ganga frá bankaláni frá Þýskalandi.“ 

Handan fjarðar í Hvalfirði eru margir hins vegar búnir að fá nóg af verksmiðjum, og þótt Silicor sé lýst sem grænni stóriðju sem mengi ekkert, og framleiði efni til að vinna orku úr sólinni, rísa menn samt upp og mótmæla. 

„Í fyrsta lagi trúi ég á rétt fólks til að gera það. Lönd okkar beggja byggja á rétti fólks til að tjá skoðanir sínar. Þessari verksmiðju fylgir enginn úrgangur, hún er umhverfisvæn, kolefnishlutlaus, þetta er svo gott verkefni, og ég held að þegar fólk skilur hvað við erum að gera þarna, - þá verður kannski enn einhver andstaða, - en ég held að fólk verði hissa á hve gott verkefni þetta er,“ segir Terry Jester.