Almenningur hafður að féþúfu fjárglæframanna

Þingmenn fordæmdu græðgisvæðinguna í þjóðfélaginu á þingfundi í morgun og gagnrýndu harðlega bónusgreiðslur til stjórnenda banka og arðgreiðslur tryggingafélaga. Almenningur væri hafður að féþúfu fjárglæframanna.

Þorsteinn Sæmundsson, þingmaður Framsóknarflokksins, reið á vaðið á þingfundi í morgun og sagði bónusgreiðslur í bönkunum sem ýmist væru að hluta eða alfarið í eigu ríkisins venjulegum Íslendingum óskiljanlegir.

„Okkur er sagt að þetta sé alþjóðlegt samkeppnisumhverfi sem kalli á þessar greiðslur,“ sagði Þorsteinn. En honum væri ekki kunnugt um að margir íslenskir bankamenn störfuðu á háum launum í útlöndum.

„Herra forseti ég er reiðubúinn að taka áhættuna af því að hér verði spekileki meðal bankamanna og þeir streymi til útlanda og fari að vinna og fari að vinna í erlendum stórbönkum. Svo illa vill til að það eru rúmlega tvö hundruð viðskiptamenntaðir menn á atvinnuleysisskrá á Íslandi og þeir geta örugglega hlaupið í skarðið,“ sagði Þorsteinn.

Og þá fyrir laun sem samræmdust íslenskum veruleika. Alþingi hafi sett lög í fyrra til að stemma stigu viðóhóflegum bónusgreiðslum til bankamanna og ef til vill þyrfti að endurskoða þau lög. Karl Garðarsson, samflokksmaður Þorsteins, gagnrýndi þetta líka sem og arðgreiðslur tryggingafélaganna og borgunarmálið svo kallaða. Þessi mál öll vektu upp spurningar um í hvers konar þjóðfélagi Íslendingar vildu búa í framtíðinni.

„Þeir sem auðguðust vel fyrir bankahrun eru ekki búnir að gleyma ljómanum sem var yfir öllu. Í dag eru komnar nýjar persónur og leikendur á sviðið en hugmyndafræðin er sú sama og hún byggist á eftirfarandi: Ég, um mig frá mér til mín,“ sagði Karl.

Sjálftökuliðið komið aftur á kreik

Ólína Þorvarðardóttir, þingmaður Samfylkingarinnar, sagði uggvænleg merki um það í samfélaginu að óminnisdansinn í kring um gullkálfinn væri hafinn á ný, rétt eins og árið 2007 væri runnið upp aftur. Þetta endurspeglaðist líka í skeitingarleysi á vettvangi strjórnmálanna.

„Einkavæðing og markaðslausnir eiga að leysa hvers manns vanda. Viðskiptafrelsið skal í hávegum haft. En velferð almennings, nærgætni og umhyggja gagnvart manneskjunni eru lítils metin,“ sagði Ólína. Borgun væri seld útvöldum hópi á bakvið tjöldin og tryggingarfélögin létu greipar sópa um bótasjóðina sem safnast hefðu upp af uppsrengdum iðgjöldum vegna ofáætlana á tjóni.

„Það er mál að linni. Það er nóg komið af því að íslenskur almenningur sé misnotaður svona og ítrekað hafður að féþúfu fjárglæframanna. Stjórnvöld verða að grípa til sinna ráða til að stöðva þessa óvissu. Það hafa verið sett lög á Íslandi af minna tilefni,“ sagði Ólína.

Bjarkey Olsen Gunnarsdóttir, þingmaður Vinstri grænna, tók undir með öðrum ræðumönnum og sagði þetta ástand ekki boðlegt.

„Sjálftökuliðið sem rak þjóðarbúið í þrot með taumlausri græðgi sinni er komið á fullt aftur. Skömm sé þeim,“ sagði Bjarkey.