Júmbóþota Iron Maiden laskaðist í höfuðborg Chile

Ed Force One, flugvél Iron Maiden, laskaðist á flugvelli í Santiago, höfuðborg Chile, í dag. Verið var að draga vélina af dráttarbíl þegar vélin losnaði frá bílnum og rann stjórnlaust á hann. Þetta kemur fram í tilkynningu á heimasíðu sveitarinnar.

Tveir flugvallarstarfsmenn, sem stýrðu dráttarbílnum, slösuðust og voru fluttir á sjúkrahús. Ekki er nánast vitað hvernig þeim heilsast. Vélin sjálf er töluvert skemmd og mun umtalsverður tími fara í viðgerðir áður en hún getur flogið á ný.

Í yfirlýsingunni segir að sem betur fer hafi tónleikagræjur sveitarinnar, sem eru um tuttugu tonn að þyngd, ekki verið komnar um borð í vélina og því ætti að vera hægt að koma þeim til Cordoba og Buenos Aires, í Argentínu, þar sem næstu tónleikar sveitarinnar eru áætlaðir.

Líkt og fram kom í samantekt Vísis fyrir skemmstu þá er flugvél sveitarinnar leiguvél frá Air Atlanta og áhöfn hennar íslensk. Söngvari sveitarinnar, Bruce Dickenson, er flugmaður og starfaði um tíð hjá Iceland Express.