Almenna lögreglan á Akureyri vopnaðist

Almenna lögreglan á Akureyri vopnaðist þegar karlmaður skaut með haglabyssu í gegnum útidyrahurð nágrannakonu sinnar í nótt. Konan var í íbúðinni með tveggja ára dóttur sinni þar til maðurinn gaf sig fram við lögreglu eftir nokkurra klukkustunda umsátur.



Líkt og Vísir hefur greint frá, þekkjast maðurinn og konan ekkert utan þess að þau búa í sama húsi og virðist árásin ekki hafa átt sér neinn aðdraganda. Lögregla segir manninn andlega veikan og unnið sé að því að hann fái viðeigandi heilbrigðisþjónustu.

Kristján Kristjánsson, yfirlögregluþjónn hjá lögreglunni á Akureyri, segir vakthafandi lögreglumenn hafa vopnast þegar tilkynning um skotin barst um klukkan um hálftvö í nótt.

„Sérsveitarmenn sem starfa hérna á Akureyri voru við vinnu og fóru líka á staðinn, bara til að kanna málið,“ segir Kristján. „Það var í rauninni verið að nálgast vettvanginn alveg þar til sá grunaði var handtekinn um fimmleytið.“

Konan sem býr í íbúðinni var þar á meðan umsátrinu stóð en taka skal fram að lögreglan tryggði að ekki væri hægt að komast að íbúð hennar.