Nauðungarvistaður á geðdeild í Reykjavík í kjölfar skothríðar á Akureyri

Maður sem hóf skothríð á heimili nágrannakonu sinnar á Akureyri í fyrrinótt verður nauðungarvistaður á geðdeild í Reykjavík en verið er að flytja hann þangað núna. Lögreglan hyggst ekki fara fram á gæsluvarðhald yfir honum en ekki var hægt að yfirheyra hann í gær þar sem hann var í geðrofi.

„Við munum heldur ekkert geta talað við hann í dag þar sem hann er einfaldlega mjög veikur,“ segir Eyþór Þorbergsson, fulltrúi lögreglustjórans á Norðurlandi eystra. Hann segir að búið sé að ræða við aðra aðila málsins og rannsókn þess sé að mestu lokið, fyrir utan það að enn eigi eftir að yfirheyra manninn.

Sakhæfi mannsins verður metið

„Það liggur alveg ljóst fyrir að mínu mati hvað gerðist en þegar maðurinn er kominn í stabílt ástand þá reiknum við frekar með að hann komi aftur hingað norður svo hægt sé að ljúka rannsókn. Hvenær það hins vegar verður liggur ekki fyrir,“ segir Eyþór. Aðspurður hvort sakhæfi mannsins verði metið við rannsókn málsins segir Eyþór að það verði gert.

Málið kom upp um klukkan hálftvö aðfaranótt sunnudags. Þá um leið fór sérsveitarmaður frá Ríkislögreglustjóra á staðinn þar sem nokkrir þeirra eru staðsettir á Akureyri. Um fimmleytið lenti síðan þyrla Landhelgisgæslunnar með aukamannskap frá sérsveitinni en skömmu síðar gekk maðurinn út úr íbúð sinni skotvopnalaus og gaf sig fram.

Maðurinn skaut alls fjórum skotum úr haglabyssu úr íbúð sinni á íbúð nágrannakonu sinnar en skotin höfnuðu meðal annars í mannlausri bifreið fyrir utan húsið. Engan sakaði. Maðurinn hefur ekki komið við sögu lögreglu áður og þá þekkjast hann og nágrannakona hans ekki neitt. Árásin virðist ekki hafa átt sér neinn aðdraganda.