Tekinn með hátt í tíu þúsund arkir af fölsuðum strætómiðum

Umfangsmikil fölsun á strætómiðum er ástæða þess að stuttur tími er gefinn til aðlögunar á notkun nýrrar tegundar strætómiða. 1. apríl næstkomandi verður ekki lengur hægt að nota gömlu miðana en hægt verður að fá nýja í skiptum fyrir þá hjá afgreiðslu Strætó í Mjódd. 

„Við getum í útskiptunum þreifað á þessum miðum og séð hvort þeir séu falsaðir eða ekki,“ segir Jóhannes Svavar Rúnarsson, framkvæmdastjóri Strætó. Fyrr í dag fjallaði Vísir um stuttan tíma sem fólk hefur til að nota úrelta strætómiða sína.

Fölsunin uppgötvaðist um áramót. „Við urðum varir við það í kringum jólin og eftir jólin að mikið í gangi af fölsuðum kortum og miðum og við fórum út í ákveðnar aðgerðir,“ segir hann. „Þar á meðal þetta sem er að gerast núna með miðana, að skipta um útlit á þeim og gera þá erfiðari í fölsun með svona „hologram“ mynd.“

Jóhannes segir skattgreiðendur séu þeir sem eru fórnarlömbin. „Það var verið að svindla á skattgreiðendum höfuðborgarsvæðisins með því að falsa miða í tugþúsunda tali,“ segir hann. Jóhannes segir að um leið og miðarnir hafi verið tilbúnir hafi verið gefinn mánuður til aðlögunar.

„Þetta er bara skipulögð glæpastarfsemi segir lögreglan,“ segir hann. „Þeir rekja þetta svolítið til útlendinga sem koma hingað en framleiða út í heimi í stórum stíl, sem tengist þá bæði Strætó og öðrum fyrirtækjum.“

Aðgerðir lögreglu hafa leitt í ljós að fölsunin er umfangsmikil. „Þeir náðu einhverjum í janúar sem var með hátt í 10 þúsund arkir af fölsuðum miðum í skottinu,“ segir hann. „Það er ekkert smáræði og það kannski skýrir af hverju við flýtum okkur svona hratt.“