Heimasætur á Mývatni komnar í slúðurpressuna

„A horse went down like the Titanic near the "Fast 8" set in Iceland after gale force winds sent a fake iceberg flying into a paddock where the animal was grazing.“

Þeir kunna að segja frá því á slúðurvefnum TMZ, en þar er greint frá því þegar hestur í gerð fældist þegar hluti leikmyndar Fast and Furious 8 fauk um í fárviðrinu um helgina. Hesturinn, sem heitir Júpíter, hljóp út í Búrfellshraun, fótbraut sig þar og þurfti að aflífa hestinn. Samkvæmt heimildum Vísis var um talsvert mikla óheppni að ræða en kvikmyndagerðarmennirnir höfðu bundið leikmyndina vandlega niður með hjálp björgunarsveita, en frauðplastkubbur brotnaði af gerviísjaka sem búið var að útbúa fyrir tökur. Og fauk sá kubbur langa vegalengd áður en hann hitti gerðið fyrir.

Morgunblaðið greindi frá málinu og birti mynd af Júpíter úr safni sínu en þar má sjá þær Ernu og Diljá Héðinsdætur sitja hross í fjárleitum, meðal annars Júpíter. Myndin er tekin fyrir ári en systurnar eru dætur Héðins Sverrissonar.

Frægð þeirra er nú orðin meiri en var hægt að sjá fyrir því TMZ er einn mest lesni fréttavefur Bandaríkjanna en kannski ekki alveg sá sem best er þokkaður. TMZ er ekkert að hafa fyrir því að vitna í Benedikt Bóas á Morgunblaðinu, blaðamannsins sem skrifar fréttina né geta þess að myndasmiðurinn er Eggert.

Í frétt TMZ kemur fram að framleiðsludeild Fast and the Furious hafi greint eigandanum frá því að skaðinn, hrossið og skemmdir á girðingu, yrði greiddur af tryggingarfélagi.