Líkur á að Verkalýðshreyfingin stofni húsnæðissamvinnufélag

Alþýðusambandið tilkynnir væntanlega á næstunni um stofnun húsnæðissamvinnufélags til að sjá um uppbyggingu og rekstur þúsunda íbúða fyrir launafólk. Forseti Alþýðusambandsins segir þörf á allt að þrjátíu þúsund íbúðum fyrir launafólk í landinu og segir verkalýðshreyfinguna sakna verkamannabústaðanna.

Eygló Harðardóttir félagsmálaráðherra er nú með nokkur húsnæðisfrumvörp fyrir Alþingi, meðal annars um félagslega leigukerfið. Verkalýðshreyfingin hefur vakið athygli á því misserum saman að mikil þörf sé á ódýru húsnæði fyrir launafólk og í tengslum við gerð síðustu kjarasamninga skuldbatt ríkið sig til að byggðar verði 2.300 félagslegar íbúðir á næstu fjórum árum.

Gylfi Arnbjörnsson forseti Alþýðusambandsins segir að þar á bæ hafi menn verið að skoða hverjir gætu tekið að sér rekstur húsnæðissamvinnufélags fyrir launafólk á landsvísu, jafnvel verkalýðshreyfingin sjálf.

„Ég vil ekki útiloka það. Menn hafa bara verið að skoða með hvaða hætti hreyfingin geti stutt við bakið á því. Við viljum tryggja að minnsta kosti að það verði hægt að mæta þessum lögum og tryggja þá framboð af leiguhúsnæði fyrir tekjulægstu hópana,“ sagði Gylfi að loknum miðstjórnarfundi í dag þar sem þetta var var rætt.

Forseti ASÍ minnir á að það hafi gerst áður í sögu verkalýðshreyfingarinnar að hún hefði frumkvæði að lausn húsnæðismála launafólks með uppbyggingu verkamannabústaða og Breiðholtsins á sínum tíma en ASI er hundrað ára um þessar mundir.

„Við teljum þetta verkefni vera okkur skylt. Þetta eru okkar félagsmenn sem málið snýst um. Við erum bara að leita hófana með hvaða hætti við getum tryggt að þessi lög, þegar þau verða samþykkt, verði þá nýtt til að skapa framboð af ódýru húsnæði,“ segir forseti ASÍ.

Verkalýðshreyfingin saknar verkamannabústaðanna

Húsnæðissamvinnufélag sem þetta þyrfti að ná samningum við sveitarfélög um ódýrar lóðir en samkvæmt frumvarpi ráðherra kæmi ríkið með 18 prósenta stofnframlag til byggingar húsnæðis sem þessa. Gylfi hefur sagt að það hafi verið mikil mistök að einkavæða íbúðirnar í verkamannabústaðakerfinu á sínum tíma.

„Það er rétt hjá þér. Við söknum þess einfaldlega og okkar fólk saknar þess kerfis. Þess vegna viljum við koma slíku á aftur og leita leiða til þess. Ég held að það sé vilji til þess í hreyfingunni að við kæmum að því með einhverjum hætti,“ segir Gylfi.

Húsnæðisfélag sem þetta gæti hugsanlega tekið að sér helming þeirra 2.300 íbúða sem rætt var um í kjarasamningum en þetta sé langtímaverkefni því þörfin sé mjög mikil.

„Já, við höfum reyndar talið að það þurfi vel á þriðja tug þúsunda íbúða til að mæta þeim þörfum. Þannig að ég hygg að við séum praktísk í því að það muni taka mér liggur við að segja mannsaldur að koma því framboði á,“ segir Gylfi Arnbjörnsson.