Stjórnarmaður RÚV segir atriði Reykjavíkurdætra klámsýningu

Kristinn Dagur Gissurarson, stjórnarmaður RÚV og fulltrúi Framsóknarflokksins þar, var afdráttarlaus í tali í síðdegisþætti á Útvarp Sögu í gær. Hann segist vilja kalla eftir viðbrögðum frá Magnúsi Geir Þórðarsyni útvarpsstjóra vegna umdeilds atriðis Reykjavíkurdætra í þætti Gísla Marteins Baldurssonar síðastliðið laugardagskvöld.

Kristinn Dagur kallar atriðið „hálfgerða klámsýningu“ sem eigi ekkert erindi í fjölskylduþátt RUV. Arnþrúður Karlsdóttir, útvarpsstjóri, ræddi við Kristinn Dag auk Péturs Gunnlaugssonar og var honum hjartanlega sammála. „Ég held að fólk sé að vonast til að sjá það að það geti treyst því þegar það er að horfa á fjölskylduþætti að það þurfi ekki að binda fyrir augu barnanna. Ekki í ríkissjónvarpinu.“

Kristinn Dagur gagnrýnir framgöngu Gísla Marteins almennt, að einkennilegt sé að hann sem sjónvarpsmaður sé úti í bæ að lýsa eindregnum pólitískum skoðunum sínum.

Þegar hann var inntur eftir því hvort það væri hlutverk stjórnar RUV að hafa afskipti af dagskrárgerð og fréttaflutningi, hvort það væri í þeirra valdi að grípa í taumana og jafnvel koma Gísla Marteini frá, eða draga til ábyrgðar eins og það er orðað, sagði Kristinn að svo væri að vísu ekki en stjórnin gæti hins vegar rekið útvarpsstjórann.

Vísir reyndi að ná tali af formanni stjórnar, Guðlaugi G. Sverrissyni, til að inna stjórnarformanninn eftir hans afstöðu en hann er fastur á einmitt stjórnarfundi RUV þar sem nú er verið að ræða ársreikning stofnunarinnar. Vísi tókst að ná stuttlega tali af Björgu Evu Erlendsdóttur og hún sagði að þetta mál hafi ekki verið tekið til umfjöllunar innan stjórnar. „Ekki enn, að minnsta kosti.“

Viðtal þeirrar Arnþrúðar og Péturs við Kristinn Dag er allrar athygli vert, fyrir áhugamenn um RUV og stöðu stofnunarinnar gagnvart stjórnmálamönnum.

Uppfært 16:18

Vísir náði tali af stjórnarformanni RÚV, Guðlaugi G. Sverrissyni og sagði hann að málið hefði verið rætt á fundi stjórnar nú í dag að frumkvæði Kristins Dags. Guðlaugur sjálfur sagðist ekki hafa skoðun á málinu, hann er reyndar þeirrar skoðunar að stjórn eigi ekki að hlutast til um einstaka dagskrárliði en það væri ekkert að því að ræða það innan stjórnar heldur. Ágætt væri að menn lýstu skoðunum sínum þar. Ekkert var hins vegar ályktað um málið á fundinum.