Einkenni myglu hjá Vinstri grænum

Myglu er líklega að finna á skrifstofum þingmanna VG. Starfsmaður þingflokksins er, að sögn Lilju Rafneyjar Magnúsdóttur, þingkonu VG, farinn að finna fyrir einkennum af myglunni.

„Það eru uppi hugmyndir um að það geti verið eitthvað slíkt á ferðinni. Það eru bæði búinn að vera leki og fólk er farið að finna fyrir einhverjum einkennum. Ég hef þó ekki fundið fyrir þeim þó ég sé með skrifstofu þarna.“ Skrifstofurnar eru staðsettar á efstu hæð í húsi við Austurstræti. Þingflokkurinn er ekki allur með skrifstofur á hæðinni en starfsmenn þingflokksins, Lilja Rafney og Steingrímur J. Sigfússon eru þar.

„Það getur vel verið að það sé eitthvað að grassera undir plötum. Vonandi verður drifið í að láta laga þetta,“ segir Lilja.

Árið 2014 greindi DV frá því að Píratar hefðu þurft að flýja skrifstofuhúsnæði sitt við Austurstræti 14 vegna myglu. Þá var þingmaðurinn Jón Þór Ólafsson farinn að fá exem vegna myglueitrunar og hafði kvartað vegna öndunarerfiðleika. Eitrunareinkenni vegna myglu geta verið mjög misjöfn hjá fólki.