Kínverjar banna samkynhneigð í sjónvarpi

Ekki má sýna samkynhneigð eða aðra „afbrigðilega“ hegðun í leiknu efni í kínversku sjónvarpi samkvæmt nýrri reglugerð þar í landi. Vinsæll sjónvarpsþáttur var tekinn úr sýningu vegna þess að í honum kom fyrir samkynhneigt par.

Ritskoðendur þar í landi hafa gefið út nýja reglugerð þar sem efni í sjónvarpi sem „ýkir hinar myrku hliðar samfélagsins“ er bannað. Þar með eru taldir þættir sem sýna samkynhneigð, framhjáhald eða einnar nætur gaman.

Í síðustu viku komu yfirvöld í Kína í veg fyrir að vinsæll leikinn sjónvarpsþáttur þar sem meðal annars er fylgst með sambandi samkynhneigðs pars yrði sýndur. Milljónir horfa á þáttinn í hverri viku og var ákvörðun kínverskra yfirvalda ekki vel tekið.

Hér má sjá brot úr þættinum sem um ræðir.

Yfirvöld segja að þátturinn hafi brotið hina nýju reglugerð en í henni segir að ekkert leikið sjónvarpsefni megi innihalda „afbrigðilegt kynferðislegt athæfi.“

Bannið gildir einnig um reykingar og drykkju sem nú er komið á bannlista yfir það sem ekki má sýna í kínversku sjónvarpi. Munu yfirvöld fylgjast náið með því að reglugerðinni verði fylgt eftir. 

Frá því að Xi Jingping tók við völdum sem forseti Kína hefur færst aukin harka í ritskoðunartilburði yfirvalda. Árið 2014 var þáttur úr hinni vinsælu þáttaröð The Empress of China tekin úr umferð vegna þess hversu mikið sást í brjóstaskoru leikara þáttanna.

Bannið þykir vera reiðarslag fyrir réttindabaráttu samkynhneigða í Kína sem barist hafa fyrir viðurkenningu um áratugaskeið. Lög sem gerðu samkynhneigð ólöglega í Kína voru gerð ógild árið 1997 og árið 2001 var samkynhneigð tekin af lista yfir geðsjúkdóma.