Umboðsmaður borgarbúa vill birta álit sín opinberlega

Ingi B. Poulsen, umboðsmaður borgarbúa, segir ekki gert ráð fyrir því að álit og niðurstöður embættisins séu birtar opinberlega en kveðst vilja að svo verði.

Ingi segir að frá því að umboðsmaður borgarbúa hafi tekið til starfa fyrir þremur árum hafi embættið gefið út álit í 37 skipti. Málum sem þangað berist ljúki þó sjaldnast með útgáfu álits.

„Flestum málum er lokið með ráðgjöf eða leiðréttingu og/eða skýringu Reykjavíkurborgar,“ segir Ingi.

Aðeins tvö af fyrrgreindum 37 álitum umboðsmanns hafa ratað í birtingu á vef embættisins. „Í samþykktum fyrir umboðsmann borgarbúa er ekki gert ráð fyrir að álit og niðurstöður séu birtar á vef embættisins. Það hefur þó verið vilji minn að opinbera þessari niðurstöður og hluta af þeirri framtíðarsýn sem ég hef fyrir embættið,“ svarar Ingi spurður hvers vegna ekki hafi verið birt fleiri álit.

Ingi segir að vegna vilja síns til að birta álitin hafi verið gerðar tilraunir með birtingar á núverandi vefsvæði embættisins en að í ljós hafi komið að vefsvæðið sé ekki nægilega heppilegt.

„Er nú unnið er að gerð nýrrar heimasíðu þar sem stefnt er að því að auka upplýsingagjöf um afgreiðslu mála hjá embættinu og stefnt að því að birta álit og stefnumarkandi niðurstöður á vef í einu eða öðru formi,“ segir umboðsmaður borgarbúa.

Hlutverk umboðsmanns borgarbúa

Umboðsmaður sér um að leiðbeina íbúum og fyrirtækjum í samskiptum við borgina við að leita réttar síns telji fólk brotið á sér og veita ráðgjöf um kæruleiðir vegna þeirra mála sem til hans koma. Heimild: Heimasíða umboðsmanns borgarbúa.